திருவண்ணாமலை மாவட்டம் வடமாதிமங்கலம் ரயில் நிலையம் அருகே, குடும்ப வறுமை மற்றும் உடல்நலக் குறைவு காரணமாகத் தம்பதியர் இருவர் ரயில் முன் பாய்ந்து தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.

திருவண்ணாமலையைச் சேர்ந்தவர் சந்திரகுமார் (42). இவரது மனைவி சிந்து (38). இவர்கள் இருவரும் நேற்று நள்ளிரவு வடமாதிமங்கலம் ரயில் நிலையம் அருகேயுள்ள தண்டவாளப் பகுதிக்குச் சென்றுள்ளனர். அப்போது அந்த வழியே வந்த அதிவேக ரயில் முன் திடீரெனப் பாய்ந்து தற்கொலை செய்து கொண்டனர். இன்று அதிகாலை தண்டவாளத்தில் இருவரின் உடல்களும் சிதைந்த நிலையில் கிடப்பதைக் கண்ட பொதுமக்கள், உடனடியாக ரயில்வே போலீசாருக்குத் தகவல் தெரிவித்தனர்.

சம்பவ இடத்திற்கு விரைந்து வந்த போலீசார், உடல்களைக் கைப்பற்றிப் பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். தொடர்ந்து நடத்தப்பட்ட சோதனையில், அவர்கள் எழுதி வைத்திருந்த தற்கொலை கடிதம் ஒன்றை போலீசார் மீட்டனர். சந்திரகுமாருக்கு நீண்ட நாட்களாகக் கடுமையான நுரையீரல் தொற்று பாதிப்பு இருந்து வந்துள்ளது. இதனால் அவரால் தொடர்ந்து வேலைக்குச் செல்ல முடியாமல் வீட்டிலேயே முடங்கும் சூழல் ஏற்பட்டுள்ளது.

குடும்பத்தின் வாழ்வாதாரம் பாதிக்கப்பட்டதால், வரும் நாட்களில் குடும்பத்தை நடத்த முடியாமலும், மருத்துவச் செலவுகளுக்காக வாங்கும் கடன் மேலும் அதிகரித்துவிடும் என்றும் தம்பதியர் இருவரும் அஞ்சியுள்ளனர். இந்தத் தீவிர மன உளைச்சல் காரணமாகவே அவர்கள் இருவரும் தற்கொலை செய்து கொள்ளும் துயர முடிவை எடுத்துள்ளதாகக் கடிதத்தில் உருக்கமாக எழுதப்பட்டிருந்தது.

இந்தச் சம்பவம் குறித்து ரயில்வே போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர். உடல்நலக் குறைவால் ஏற்பட்ட கடன் பயத்தின் காரணமாகத் தம்பதியர் தற்கொலை செய்து கொண்ட சம்பவம் உறவினர்கள் மற்றும் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.

மனநல ஆலோசனைக்கான உதவி எண்கள்: உங்களுக்குள் ஏதேனும் மன உளைச்சல் அல்லது தற்கொலை எண்ணங்கள் தோன்றினால், தயவுசெய்து மாநில அரசின் இலவச உதவி எண்களைத் தொடர்பு கொண்டு ஆலோசனை பெறலாம். சினேகா தற்கொலை தடுப்பு உதவி எண்: 044-24640050 மாநில சுகாதாரத் துறை உதவி எண்: 104