அதிமுகவின் முன்னாள் அமைச்சரும், அக்கட்சியின் முக்கியப் பிரமுகர்களில் ஒருவருமான கே.டி.ராஜேந்திர பாலாஜிக்கு எதிராகத் தொடரப்பட்ட அரசு வேலை வாங்கித் தருவதாகக் கூறி ரூ.3 கோடி மோசடி செய்த வழக்கில், ஸ்ரீவில்லிபுத்தூர் நீதிமன்றம் வெளிநாடு செல்வதற்குத் தடை விதித்து உத்தரவிட்டுள்ளது. இந்த நீதிமன்ற உத்தரவானது தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.

கடந்த அதிமுக ஆட்சிக் காலத்தின் போது, பால்வளத்துறை அமைச்சராகப் பதவி வகித்தவர் கே.டி.ராஜேந்திர பாலாஜி. இவர் தன் அதிகாரத்தைப் பயன்படுத்தி ஆவின் மற்றும் அரசுத் துறைகளில் வேலை வாங்கித் தருவதாகக் கூறி பல்வேறு நபர்களிடம் பல லட்சக்கணக்கில் பணம் பெற்றுக்கொண்டு மோசடி செய்ததாகப் புகார்கள் எழுந்தன. இதுதொடர்பாக விருதுநகர் மாவட்ட குற்றப்பிரிவு காவல்துறையினர் வழக்குப்பதிவு செய்து தீவிர விசாரணை மேற்கொண்டு வந்தனர்.

குறிப்பாக, அரசு வேலை வாங்கித் தருவதாகக் கூறி சுமார் 3 கோடி ரூாய்க்கும் அதிகமாகப் பணம் பெற்றுவிட்டு ஏமாற்றியதாகப் பாதிக்கப்பட்டவர்கள் அளித்த புகார்களின் அடிப்படையில் சட்டப்பிரிவுகளின் கீழ் வழக்குப் பதிவு செய்யப்பட்டது. இச்சம்பவம் அப்போது தமிழக அரசியலில் பெரும் அதிர்வலைகளை ஏற்படுத்தியிருந்ததுடன், காவல்துறையினர் அவரைத் தேடும் படலத்தையும் தீவிரப்படுத்தினர். வழக்கில் கைது நடவடிக்கைத் தவிர்க்க அவர் தலைமறைவானதும், பின்னர் கர்நாடகாவில் தனிப்படை காவல்துறை மூலம் கைது செய்யப்பட்டதும் பெரும் பரபரப்பான நிகழ்வுகளாக அரங்கேறின.

இந்த வழக்கின் விசாரணை நிலுவையில் உள்ள நிலையில், முன்னாள் அமைச்சர் ராஜேந்திர பாலாஜி முறையான அனுமதியின்றி வெளிநாடுகளுக்குத் தப்பிச் செல்வதைத் தவிர்க்கும் வகையில் ஸ்ரீவில்லிபுத்தூர் நீதிமன்றம் இந்த உத்தரவைப் பிறப்பித்துள்ளது. ராஜேந்திர பாலாஜி வெளிநாடுகளுக்குச் செல்ல முழுமையான தடை விதிக்கப்பட்டுள்ளது. அவர் தனது கடவுச்சீட்டை (Passport) உடனடியாக நீதிமன்றத்தில் திரும்ப ஒப்படைக்க வேண்டும்.

நீதிமன்றத்தின் முன் அனுமதியின்றி அவர் நாட்டின் எல்லைகளைத் தாண்டி வெளிநாடுகளுக்குப் பயணம் மேற்கொள்ளக் கூடாது. இந்த உத்தரவு அமலுக்கு வந்துள்ளதால், வழக்கின் விசாரணை முடியும் வரை அவர் வெளிநாடு செல்ல முடியாத சூழல் ஏற்பட்டுள்ளது.

முன்னாள் அமைச்சர் மீதான ஊழல் மற்றும் வேலைவாய்ப்பு மோசடி வழக்குகள் நீதிமன்றத்தில் தீவிரமாக விசாரிக்கப்பட்டு வரும் சூழலில், நீதிமன்றம் வெளிநாட்டுப் பயணங்களுக்குத் தடை விதித்திருப்பது அதிமுகவினர் மத்தியில் விவாதப் பொருளாகியுள்ளது. சட்டப்பூர்வமான இந்த நடவடிக்கைகளால், வழக்கு விசாரணையை எதிர்கொள்ளும் நெருக்கடி ராஜேந்திர பாலாஜிக்கு மேலும் அதிகரித்துள்ளது. இது குறித்த கூடுதல் சட்டப்பூர்வ நகர்வுகள் மற்றும் நீதிமன்றத்தின் அடுத்த கட்ட நடவடிக்கைகள் என்னவாக இருக்கும் என்ற எதிர்பார்ப்பு அரசியல் அரங்கில் எழுந்துள்ளது.