தொடரும் சோகம்...  பட்டாசு ஆலை  வெடிவிபத்தில் சிக்கி இருவர் உடல் சிதறி பரிதாப பலி!

தேனி மாவட்டம் ஓடைப்பட்டி அருகே உள்ள ஒரு பட்டாசு உற்பத்தி ஆலையில் இன்று காலை எதிர்பாராத விதமாக பயங்கர வெடிவிபத்து ஏற்பட்டது. பட்டாசு தயாரிப்பு பணியில் தொழிலாளர்கள் தீவிரமாக ஈடுபட்டிருந்தபோது மருந்துகளுக்கு இடையே ஏற்பட்ட உராய்வு காரணமாக இந்த விபத்து நேரிட்டதாக முதற்கட்ட தகவல்கள் தெரிவிக்கின்றன. இந்த விபத்தில் ஆலை கட்டிடம் தரைமட்டமானதுடன் அங்கு வேலை பார்த்துக் கொண்டிருந்த இருவர் சம்பவ இடத்திலேயே உடல் சிதறி பரிதாபமாக உயிரிழந்தனர்.

சத்தம் கேட்டு ஓடிவந்த அக்கம் பக்கத்தினர் இது குறித்து தீயணைப்புத் துறை மற்றும் போலீசாருக்கு தகவல் தெரிவித்தனர். விரைந்து வந்த தீயணைப்பு வீரர்கள் நீண்ட நேரம் போராடி தீயை அணைத்ததுடன் இடிபாடுகளுக்குள் சிக்கியிருந்த மற்றவர்களை மீட்கும் பணியில் ஈடுபட்டனர். இந்த விபத்தில் மேலும் சிலர் படுகாயம் அடைந்துள்ள நிலையில் அவர்கள் சிகிச்சைக்காக தேனி அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டுள்ளனர்.

சம்பவம் குறித்து வழக்குப்பதிவு செய்துள்ள போலீசார் பட்டாசு ஆலை உரிய அனுமதியுடன் செயல்பட்டதா மற்றும் பாதுகாப்பு விதிமுறைகள் முறையாக பின்பற்றப்பட்டதா என்பது குறித்து தீவிர விசாரணை நடத்தி வருகின்றனர். விபத்து நடந்த பகுதியை மாவட்ட ஆட்சியர் மற்றும் உயர் போலீஸ் அதிகாரிகள் நேரில் பார்வையிட்டு ஆய்வு செய்தனர். பலியானவர்களின் குடும்பத்தினருக்கு ஆழ்ந்த இரங்கலைத் தெரிவித்துள்ள அதிகாரிகள் உரிய நிவாரணம் வழங்க நடவடிக்கை எடுக்கப்படும் என உறுதி அளித்துள்ளனர்.