சர்வதேச சந்தையில் கச்சா எண்ணெய் விலை உயர்வு... உலக நாடுகளில் பெரும் பரபரப்பு!

ஈரான் மற்றும் இஸ்ரேல் ஆகிய நாடுகளுக்கு இடையே ஏற்பட்டுள்ள தீவிரப் போர்ச் சூழல் காரணமாக, சர்வதேசச் சந்தையில் கச்சா எண்ணெயின் விலை நேற்று ஒரே நாளில் 3% வரை உயர்ந்தது. மத்திய கிழக்கு நாடுகளில் நிலவி வரும் இந்த அசாதாரணப் பதற்றம் காரணமாக, உலக அளவில் கச்சா எண்ணெய் விநியோகம் பாதிக்கப்படலாம் என்ற அச்சம் முதலீட்டாளர்கள் மத்தியில் பரவலாக எழுந்துள்ளது. இதனால் உலகச் சந்தையில் வர்த்தகம் செய்யப்படும் எண்ணெயின் விலையில்  திடீர் மாற்றம் ஏற்பட்டுள்ளது.

இந்த விலை உயர்வின் காரணமாக, சர்வதேசச் சந்தையில் ஒரு பீப்பாய் கச்சா எண்ணெயின் விலை 95 டாலரை கடந்து புதிய உச்சத்தைத் தொட்டது. இந்த  விலை ஏற்றம் காரணமாக, கச்சா எண்ணெயை நம்பியிருக்கும் இந்தியா உள்ளிட்ட பல்வேறு உலக நாடுகளின் பொருளாதார வல்லுநர்கள் மத்தியில் பெரும் பரபரப்பும் கவலையும் ஏற்பட்டது. எரிபொருள் விலை உயர்ந்தால் உள்நாட்டில் அத்தியாவசியப் பொருட்களின் விலையும் அதிகரிக்கும் என்பதால் இந்த நிலவரம் உற்றுநோக்கப்பட்டது.

நேற்று மிகக் கடுமையான விலையேற்றத்தைச் சந்தித்த கச்சா எண்ணெய், இன்று அதன் விலையில் சற்று சரிவைச் சந்தித்துள்ளது. உலகச் சந்தையின் இன்றைய நிலவரப்படி, கச்சா எண்ணெயின் விலை 94 டாலருக்கும் கீழே குறைந்து தற்சமயம் வர்த்தகமாகி வருகிறது. மத்திய கிழக்கில் போர் பதற்றம் இன்னும் முழுமையாகத் தணியாத நிலையில், வரும் நாட்களிலும் கச்சா எண்ணெயின் வர்த்தகம் மற்றும் அதன் விலை நிலவரத்தில் தொடர்ந்து ஏற்ற இறக்கங்கள் நீடிக்க வாய்ப்புள்ளதாகக் கூறப்படுகிறது.