உத்தர பிரதேச மாநிலம் பிரயாக்ராஜ் பகுதியைச் சேர்ந்த பல்லவி சிங் ராஜ்புட் என்பவர் டேட்டிங் செயலிகள் மூலம் வெவ்வேறு பெயர்களில் கணக்குகளைத் தொடங்கி இளைஞர்களை ஏமாற்றி வந்துள்ளார். அந்தச் செயலிகளில் இருக்கும் இளைஞர்களிடம் ஆசையாகப் பேசிப் பழகித் தனது காதல் வலையில் வீழ்த்தி அவர்களைத் தன்வசப்படுத்திக் கொண்டுள்ளார். நேரில் சந்திக்கும் சமயங்களில் அந்த இளைஞர்களுடன் நெருக்கமாகப் பழகி அவர்கள் மீது முழுமையான நம்பிக்கையை ஏற்படுத்தியுள்ளார். அந்தத் தருணத்தில் அவர்களின் அந்தரங்கமான புகைப்படங்கள் மற்றும் வீடியோக்களைப் பல்லவி ரகசியமாக எடுத்து வைத்துக் கொண்டு தனது மோசடி வேலையைத் தொடங்கியுள்ளார்.

View this post on Instagram

A post shared by KNews Odisha (@knewsodisha)

புகைப்படங்களைக் காட்டி மிரட்டிப் பணம் பறித்ததுடன் பணம் தர மறுப்பவர்கள் மீது பொய்யான பாலியல் வன்கொடுமைப் புகார்களையும் அவர் அளித்துள்ளார். இவ்வாறு மிரட்டலுக்குப் பணியாத ஐந்து பேரை காவல்துறையின் போலி வழக்குகளில் சிக்கவைத்துத் தனது கைவரிசையைக் காட்டியுள்ளார். இந்த மோசடி மூலம் கிடைத்த கோடிக்கணக்கான ரூபாய் பணத்தைக் கொண்டு அவர் சொகுசு வாழ்க்கை வாழ்ந்து வந்ததாகக் காவல்துறையினர் தெரிவித்துள்ளனர். இதுகுறித்த புகாரின் அடிப்படையில் காவல்துறையினர் தீவிர விசாரணை நடத்தி பல்லவி சிங் ராஜ்புட்டைப் பாதுகாப்பாகக் கைது செய்துள்ளனர்.

இளைஞர்களை ஏமாற்றி இதுவரை சுமார் ஆறு கோடி ரூபாய் வரை அவர் பணம் பறித்துள்ளதாகப் போலீஸ் விசாரணையில் திடுக்கிடும் தகவல்கள் வெளியாகியுள்ளன. டேட்டிங் செயலிகளைப் பயன்படுத்தும் போது பொதுமக்கள் எச்சரிக்கையுடன் இருக்க வேண்டும் என்பதை இந்தச் சம்பவம் மீண்டும் ஒருமுறை சுட்டிக்காட்டியுள்ளது. கைது செய்யப்பட்டுள்ள பல்லவியிடம் காவல்துறையினர் தொடர்ந்து விசாரணை நடத்தி இந்த நெட்வொர்க்கில் வேறு யாருக்கேனும் தொடர்பு உள்ளதா எனத் தேடி வருகின்றனர்.