தாய்லாந்து தலைநகர் பாங்காக்கில் உள்ள மதுக்கூடம் ஒன்றில் கடந்த ஞாயிற்றுக்கிழமை (ஜூலை 12) இரவு நேரிட்ட பயங்கர தீ விபத்தில் சிக்கி உயிரிழந்தவர்களின் எண்ணிக்கை தற்போது 32 ஆக அதிகரித்துள்ளது.

பாங்காக் நகரில் உள்ள புகழ்பெற்ற மதுக்கூடம் ஒன்றில் ஞாயிறு இரவு வாடிக்கையாளர்கள் நிறைந்திருந்த நேரத்தில் திடீரென தீ விபத்து ஏற்பட்டது. தீ மளமளவென பரவியதோடு, கட்டிடம் முழுவதும் கரும்புகை சூழ்ந்து கொண்டதால் அங்கிருந்தவர்களால் உடனடியாக வெளியேற முடியவில்லை. குறிப்பாக, பாரில் இருந்த பலர் உயிர் பிழைப்பதற்காக அங்கிருந்த குளியலறைகளுக்குள் சென்று தஞ்சமடைந்துள்ளனர். ஆனால், அந்த அறைகளில் ஜன்னல்கள் ஏதும் இல்லாததாலும், காற்றோட்டம் இல்லாததாலும் நச்சுப் புகை உள்ளே புகுந்து, தப்பிக்க வழியின்றி மூச்சுத்திணறிப் பலர் பரிதாபமாக உயிரிழந்தது தற்போதைய விசாரணையில் தெரிய வந்துள்ளது.

விபத்து நடந்த முதற்கட்ட விசாரணையில் 27 பேர் பலியானதாக அறிவிக்கப்பட்ட நிலையில், மருத்துவமனையில் சிகிச்சை பெற்று வந்தவர்களில் அடுத்தடுத்து சிலர் பலியானதைத் தொடர்ந்து தற்பொழுது பலி எண்ணிக்கை 32 ஆக உயர்ந்துள்ளது.

இந்த விபத்தில் மொத்தம் 70 பேர் வரை காயமடைந்துள்ளனர். அவர்களில் 15 பேரின் நிலைமை தற்போதும் மிகவும் கவலைக்கிடமாக உள்ளதால், அவர்களுக்குத் தீவிர சிகிச்சை பிரிவில் அவசரச் சிகிச்சை அளிக்கப்பட்டு வருகிறது. இதனால் பலி எண்ணிக்கை மேலும் உயரக்கூடும் என அஞ்சப்படுகிறது.

இந்தக் கொடூர தீ விபத்துக்கான சரியான காரணம் என்ன என்பது குறித்துத் தாய்லாந்து நாட்டுப் போலீசார் மற்றும் தடயவியல் நிபுணர்கள் தொடர்ந்து தீவிர விசாரணை நடத்தி வருகின்றனர். மதுக்கூடத்தில் முறையான தீயணைப்புப் பாதுகாப்பு வழிமுறைகள் மற்றும் அவசரக் கால வழித்தடங்கள் ஒழுங்காகப் பராமரிக்கப்பட்டதா என்ற கோணத்திலும் அதிகாரிகள் விசாரணையை முடுக்கிவிட்டுள்ளனர். இச்சம்பவம் சர்வதேச அளவில் பெரும் சோகத்தை ஏற்படுத்தியுள்ளது.