தாய்லாந்து நாட்டின் தலைநகர் பாங்காக்கில் உள்ள பிரபல கேளிக்கை விடுதியில் கடந்த ஞாயிற்றுக்கிழமை இரவு நேரிட்ட பயங்கர தீ விபத்தில் சிக்கி, தற்பொழுது பலி எண்ணிக்கை 30 ஆக அதிகரித்துள்ளது. மருத்துவமனையில் தீவிர சிகிச்சைப் பிரிவில் அனுமதிக்கப்பட்டிருந்தவர்களில் மேலும் 3 பேர் சிகிச்சை பலனின்றி உயிரிழந்ததைத் தொடர்ந்து இந்த சோகம் நேரிட்டுள்ளது.

உலகப் புகழ்பெற்ற சுற்றுலாத் தலமான பாங்காக்கின் முக்கியப் பகுதியான 'சடுசக்' என்ற இடத்தில் இந்த நைட்கிளப் இயங்கி வந்தது. வார இறுதி நாளான கடந்த ஞாயிற்றுக்கிழமை இரவு என்பதால், உள்ளூர் மக்கள் மற்றும் வெளிநாட்டுச் சுற்றுலாப் பயணிகள் எனப் ஏராளமானோர் அங்கு திரண்டிருந்தனர். அப்போது எதிர்பாராத விதமாகக் கேளிக்கை விடுதியின் ஒரு பகுதியில் பயங்கரத் தீ விபத்து ஏற்பட்டது.

தீ மளமளவென விடுதி முழுவதும் பரவியதால், அங்கிருந்த 50-க்கும் மேற்பட்டோர் வெளியேற முடியாமல் உள்ளேயே சிக்கிக் கொண்டனர். தகவலறிந்து சம்பவ இடத்திற்கு விரைந்து வந்த தீயணைப்பு மற்றும் அவசரக்கால மீட்புக்குழுவினர், பல மணி நேரம் போராடித்தீயைக் கட்டுக்குள் கொண்டு வந்து, உள்ளே சிக்கியவர்களை மீட்டனர்.

தீ விபத்து ஏற்பட்ட அன்றைய தினமே சம்பவ இடத்திலும், மருத்துவமனைக்குக் கொண்டு செல்லும் வழியிலும் 27 பேர் பரிதாபமாக உயிரிழந்தனர். மேலும் 20-க்கும் மேற்பட்டோர் உடல் கருகிய நிலையில் மீட்கப்பட்டு தீவிர சிகிச்சைப் பிரிவில் அனுமதிக்கப்பட்டிருந்தனர். இந்நிலையில், மருத்துவமனையில் உயிருக்குப் போராடிக் கொண்டிருந்தவர்களில் மேலும் 3 பேர் நேற்று மாலை சிகிச்சை பலனின்றி அடுத்தடுத்து பரிதாபமாக உயிரிழந்தனர். இதன் மூலம் ஒட்டுமொத்த பலி எண்ணிக்கை 30 ஆக உயர்ந்துள்ளது. சிகிச்சை பெற்று வரும் மேலும் சிலரது நிலைமையும் மிகவும் கவலைக்கிடமாக உள்ளதால், பலி எண்ணிக்கை இன்னும் உயரக்கூடும் என அஞ்சப்படுகிறது.

இந்தக் கொடூரத் தீ விபத்து குறித்துத் தாய்லாந்து நாட்டுப் போலீசார் மற்றும் தடய அறிவியல் நிபுணர்கள் நடத்திய முதற்கட்ட விசாரணையில் அதிர்ச்சித் தகவல் வெளியாகியுள்ளது.

கேளிக்கை விடுதியில் குளிரூட்டப்பட்ட அறையின் ஏசியில் ஏற்பட்ட திடீர் மின் கசிவு (Short Circuit) காரணமாகவே இந்தத் தீ விபத்து ஏற்பட்டுள்ளது கண்டறியப்பட்டுள்ளது. தற்பொழுது விபத்து நேரிட்ட கேளிக்கை விடுதி முழுமையாக மூடப்பட்டு, பாதுகாப்பு விதிமுறைகள் முறையாகப் பின்பற்றப்பட்டதா என்பது குறித்து அதிகாரிகள் தீவிர விசாரணை மேற்கொண்டு வருகின்றனர்.