பாகிஸ்தான் நாட்டின் பலூசிஸ்தான் மாகாணம் குவாட்டா அருகே சோரங்கே பகுதியில் உள்ள நிலக்கரி சுரங்கத்தில் ஏற்பட்ட மீத்தேன் வாயு வெடி விபத்தில் சிக்கி உயிரிழந்தவர்களின் எண்ணிக்கை 34 ஆக உயர்ந்துள்ளது.

சுரங்கத்தில் தொழிலாளர்கள் பணி மாற்றத்தில் ஈடுபட்டிருந்தபோது, நிலத்தடியில் சுமார் 4,000 அடி ஆழத்தில் நச்சுத்தன்மை கொண்ட மீத்தேன் வாயு கசிந்து பயங்கர வெடி விபத்தும் தீ விபத்தும் ஏற்பட்டது. வெடி விபத்தின் தீவிரத்தால் சுரங்கத்தின் முகப்பு மற்றும் மேற்கூரை இடிந்து விழுந்ததில், அங்கிருந்த 50-க்கும் மேற்பட்ட தொழிலாளர்கள் இடிபாடுகளுக்குள் சிக்கிக் கொண்டனர். அருகிலுள்ள மற்றொரு சுரங்கப் பகுதியும் இந்த விபத்தினால் பாதிப்படைந்தது.

தகவல் அறிந்து விரைந்து வந்த மாநில பேரிடர் மேலாண்மை ஆணையத்தின் மீட்புக் குழுவினர் தீவிர தேடுதல் நடவடிக்கையில் ஈடுபட்டு, இதுவரை 34 தொழிலாளர்களின் சடலங்களை மீட்டுள்ளனர். 20-க்கும் மேற்பட்டோர் காயங்களுடன் மீட்கப்பட்டுள்ளனர். ஆபத்தான வாயுக்களின் தாக்கம் மற்றும் ஆழமான இடிபாடுகள் காரணமாக எஞ்சியுள்ள தொழிலாளர்களை மீட்கும் பணி சவாலாக உள்ளது.

விபத்தில் உயிரிழந்த தொழிலாளர்களின் குடும்பங்களுக்குத் தலா 5 லட்சம் பாகிஸ்தான் ரூபாயும் ($1,800), காயமடைந்தவர்களுக்குத் தலா 3 லட்சம் ரூபாயும் நிவாரணமாக வழங்கப்படும் என பலூசிஸ்தான் சுரங்கத்துறை அமைச்சர் ஷோயப் நோஷெர்வானி அறிவித்துள்ளார். போதிய காற்றோட்ட வசதி மற்றும் பாதுகாப்புக் கருவிகள் இல்லாததே இது போன்ற தொடர் விபத்துகளுக்குக் காரணம் எனப் பலூசிஸ்தான் தொழிலாளர் சங்கங்கள் குற்றம் சாட்டியுள்ளன.