டெல்லி மற்றும் தேசிய தலைநகர் பிராந்தியத்தில் (NCR) தீபாவளியை முன்னிட்டு, நவம்பர் 7 மற்றும் 8 ஆகிய இரண்டு நாட்கள் மட்டுமே சான்றளிக்கப்பட்ட பசுமை பட்டாசுகளை வெடிக்க உச்ச நீதிமன்றம் அனுமதி அளித்துள்ளது. இதற்கும் குறிப்பிட்ட நேரக் கட்டுப்பாடுகள் விதிக்கப்பட்டுள்ளன.

அதன்படி, இரு நாட்களிலும் காலை 6 மணி முதல் 7 மணி வரையும், இரவு 8 மணி முதல் 10 மணி வரையும் மட்டுமே பட்டாசு வெடிக்கலாம். மருத்துவமனைகள், முதியோர் இல்லங்கள், கல்வி நிறுவனங்கள் மற்றும் அறிவிக்கப்பட்ட அமைதிப் பகுதிகளைச் சுற்றி 300 மீட்டர் வரையிலான இடங்களில் பட்டாசு வெடிக்கத் தடை விதிக்கப்பட்டுள்ளது.

CSIR-NEERI மற்றும் PESO சான்று பெற்ற பசுமை பட்டாசுகளை மட்டுமே பயன்படுத்த வேண்டும். பேரியம் கலந்த பட்டாசுகள், அங்கீகரிக்கப்படாத பட்டாசுகள் மற்றும் சரவெடி போன்ற தொடர் பட்டாசுகளுக்கு அனுமதி இல்லை.

மேலும், நவம்பர் 9 முதல் பட்டாசுகளுக்கான முழுமையான தடை மீண்டும் அமலுக்கு வரும் என்று நீதிமன்றம் தெரிவித்துள்ளது. பட்டாசு விற்பனை மற்றும் பயன்பாட்டைக் கண்காணிக்க அதிகாரிகள் நடவடிக்கை எடுக்கவும் உத்தரவிடப்பட்டுள்ளது.