'திமுக ஆட்சி ஊழல்கள் குறித்து விரைவில் வெள்ளை அறிக்கை' - அமைச்சர் ரமேஷ் திட்டவட்டம்!

சுதந்திரப் போராட்ட வீரர் தீரன் சின்னமலையின் 221-வது நினைவு தினத்தை முன்னிட்டு, நேற்று திருச்சி மாவட்ட ஆட்சியர் அலுவலகம் எதிரில் உள்ள அவரது உருவச்சிலைக்குத் தமிழ்நாடு இந்து சமய அறநிலையத் துறை அமைச்சர் ரமேஷ் மாலை அணிவித்து மரியாதை செலுத்தினார். இந்நிகழ்வில் துணைச் சபாநாயகர் ரவிசங்கர், சட்டமன்ற உறுப்பினர்கள் மற்றும் முக்கிய நிர்வாகிகள் கலந்து கொண்டனர்.

இந்த நிகழ்வுக்குப் பின் செய்தியாளர்களைச் சந்தித்த அமைச்சர் ரமேஷ், "கடந்த திமுக ஆட்சிக் காலத்தில் இந்து சமய அறநிலையத் துறையில் நடைபெற்ற ஊழல்கள் மற்றும் கோவில் சொத்துக்கள் அபகரிக்கப்பட்டது குறித்து விரைவில் வெள்ளை அறிக்கை வெளியிடத் திட்டமிடப்பட்டு வருகிறது" என்று தெரிவித்தார். இது குறித்து முழுமையாக விசாரணை நடத்தத் தனிக்குழுக்கள் அமைக்கப்பட்டு, கோவில் சொத்துக்கள் அனைத்தும் எவ்வித சமரசமுமின்றி மீட்டெடுக்கப்பட்டுப் பாதுகாக்கப்படும் என்றார்.

கோவில்களில் தரிசனத்திற்காக லஞ்சம் வாங்கும் சம்பவங்கள் 80 சதவீதம் கட்டுப்படுத்தப்பட்டுள்ளன என்றும், எஞ்சிய புகார்கள் மீது விசாரணை நடத்தப்பட்டுக் குற்றவாளிகள் மீது பாரபட்சமின்றி நடவடிக்கை எடுக்கப்படும் என்றும் உறுதி அளித்தார்.

"நாம் தமிழர் கட்சியினர் 15 ஆண்டுகளாகப் பயிற்சி மட்டுமே எடுத்து வருகின்றனர். வெறுப்பு அரசியலை விட்டுவிட்டு நேர்மறையான அரசியலை முன்னெடுத்தால், உள்ளாட்சித் தேர்தலில் சீமானின் கட்சி சில இடங்களில் வெல்ல வாய்ப்புள்ளது" எனக் குறிப்பிட்டார்.

"தான் ஓடி ஒளியவில்லை எனக் கூறும் செந்தில் பாலாஜி இவ்வளவு நாட்களாக எங்கே இருந்தார்? தைரியமாக வந்து நீதிமன்ற நடைமுறைகளை எதிர்கொள்ள வேண்டும்" என்று கேள்வி எழுப்பினார். காவிரி மற்றும் கொள்ளிடம் ஆறுகளில் தடுப்பணைகள் கட்ட வேண்டும் என்ற விவசாயிகளின் கோரிக்கை குறித்து ஆய்வு செய்யப்பட்டு வருவதாகவும், பட்ஜெட் சூழலுக்கு ஏற்ப உரிய அறிவிப்புகள் வெளியாகும் என்றும் அமைச்சர் தெரிவித்தார்.