தமிழக முதலமைச்சர் தொடர்பாகச் சர்ச்சைக்குரிய வகையில் பேசியதாகத் தொடரப்பட்ட வழக்கில், விளாத்திகுளம் தொகுதி திமுக சட்டமன்ற உறுப்பினர் ஜி.வி. மார்க்கண்டேயன் காவல்துறையினரால் கைது செய்யப்பட்டு, ஆகஸ்ட் 3-ஆம் தேதி வரை நீதிமன்றக் காவலில் சிறையில் அடைக்கப்பட்டார். இச்சம்பவம் தூத்துக்குடி மற்றும் தென் மாவட்ட அரசியல் வட்டாரத்தில் பெரும் பரபரப்பையும் கொந்தளிப்பையும் ஏற்படுத்தியுள்ளது.

திமுக எம்.எல்.ஏ ஜி.வி. மார்க்கண்டேயன் பேசிய பேச்சுக்கு எதிர்ப்பு தெரிவித்து, தமிழக வெற்றிக் கழகம்  சார்பில் தூத்துக்குடி மாவட்டக் குற்றப்பிரிவில் அதிகாரப்பூர்வமாகப் புகார் அளிக்கப்பட்டது. இந்தப் புகாரின் அடிப்படையில் உடனடியாகச் செயல்பட்ட காவல்துறையினர், விளாத்திகுளத்தில் உள்ள எம்.எல்.ஏ-வின் வீட்டிற்குச் சென்று அவரை கைது செய்தனர்.

கைது தகவலறிந்த திமுக நிர்வாகிகள் மற்றும் தொண்டர்கள் திரண்டு வந்து, காவல்துறையின் வாகனத்தை முற்றுகையிட்டு முழக்கங்களை எழுப்பினர். இதனால் அப்பகுதியில் ஒரு மணி நேரத்திற்கும் மேலாகப் பலத்த பதற்றம் நிலவியது. பின்னர் காவல்துறையினர் அவர்களை அப்புறப்படுத்தி எம்.எல்.ஏ-வை விசாரணைக்கு அழைத்துச் சென்றனர். கைது செய்யப்பட்ட ஜி.வி. மார்க்கண்டேயனிடம் தீவிர விசாரணை நடத்திய காவல்துறையினர், அரசு மருத்துவமனையில் அவருக்கு மருத்துவப் பரிசோதனை மேற்கொண்டு தூத்துக்குடி நீதிமன்றத்தில் ஆஜர்படுத்தினர்.

வழக்கை விசாரித்த நீதிபதி சுமதி, எம்.எல்.ஏ ஜி.வி. மார்க்கண்டேயனை ஆகஸ்ட் 3-ஆம் தேதி வரை 15 நாட்கள் நீதிமன்றக் காவலில் சிறையில் அடைக்க உத்தரவிட்டார். பாளையங்கோட்டை சிறையில் அடைப்பு: நீதிபதியின் உத்தரவைத் தொடர்ந்து, காவல்துறையினர் பலத்த பாதுகாப்புடன் அவரைப் பாளையங்கோட்டை மத்திய சிறைக்கு அழைத்துச் சென்று அடைத்தனர்.