தீபாவளிக்கு  இதை மறந்துடாதீங்க… நல்லெண்ணெய் குளியல் செய்யும் சரியான முறை என்ன?

தீபாவளி பண்டிகை என்றாலே புத்தாடை, பட்டாசு, இனிப்புகளுடன் அதிகாலையில் எண்ணெய் தேய்த்துக் குளிப்பதும் முக்கியமான பாரம்பரியமாக இருந்து வருகிறது. குறிப்பாக, தீபாவளி நாளன்று நல்லெண்ணெய் தேய்த்துக் குளிப்பது உடலுக்கும் மனதுக்கும் புத்துணர்ச்சி அளிக்கும் வழக்கமாகப் பின்பற்றப்படுகிறது.

எண்ணெய் குளியல் செய்வது எப்படி?

பாரம்பரிய முறையில் நல்லெண்ணெயுடன் சிறிதளவு சீரகம் சேர்த்து லேசாகச் சூடாக்கி, உடல் தாங்கக்கூடிய மிதமான சூட்டில் தலையிலும் உடலிலும் தேய்த்துக் கொள்ளலாம். எண்ணெயைத் தேய்த்த பிறகு நீண்ட நேரம் காத்திருக்காமல், சுமார் 15 முதல் 30 நிமிடங்களுக்குள் வெதுவெதுப்பான நீரில் குளிக்கலாம்.

எண்ணெய் குளியலின்போது வழக்கமான சோப்பு, ஷாம்புவுக்குப் பதிலாக சீயக்காய் அல்லது அரப்புத் தூள் பயன்படுத்துவது பாரம்பரிய வழக்கம். அதிகாலையில் 3 மணி முதல் 5 மணிக்குள் எண்ணெய் குளியல் செய்வதும் மரபாகக் கடைப்பிடிக்கப்படுகிறது.

எண்ணெயை அதிகமாகச் சூடாக்கக் கூடாது. தோல் எரிச்சல், ஒவ்வாமை அல்லது உடல்நலப் பிரச்சினைகள் இருப்பவர்கள் தங்களுக்கு ஏற்ற முறையைப் பின்பற்ற வேண்டும். குழந்தைகளுக்கு எண்ணெய் குளியல் கொடுக்கும்போது கூடுதல் கவனம் அவசியம்.