சென்னை தலைமைச் செயலகத்தில் இன்று நடைபெற்ற தமிழக அமைச்சரவைக் கூட்டத்தில், பொதுமக்கள் மற்றும் ஏழை எளிய மக்களின் நலனைக் கருத்தில் கொண்டு அரசுப் பேருந்து கட்டணங்களை உயர்த்தக் கூடாது எனப் போக்குவரத்துத் துறை அதிகாரிகளுக்கும், அமைச்சர்களுக்கும் முதலமைச்சர் விஜய் திட்டவட்டமாக அறிவுறுத்தியுள்ளார்.

தலைமைச் செயலகத்தில் உள்ள கூட்ட அரங்கில் இன்று நடைபெற்ற இந்த உயர்மட்ட அமைச்சரவைக் கூட்டத்தில் அனைத்துத் துறை அமைச்சர்களும், முக்கிய அரசு அதிகாரிகளும் கலந்து கொண்டனர். இக்கூட்டத்தில் பல்வேறு முக்கியத் திட்டங்கள் குறித்து ஆலோசிக்கப்பட்ட போது, போக்குவரத்துத் துறையின் செயல்பாடுகள் குறித்தும் விவாதிக்கப்பட்டது. அப்போது பேசிய முதலமைச்சர் விஜய், தற்போதைய சூழலில் பொதுமக்களுக்குக் கூடுதல் நிதிச்சுமையை ஏற்படுத்தும் வகையில் பேருந்து கட்டணங்களை எக்காரணம் கொண்டும் உயர்த்தக் கூடாது என்பதில் உறுதியாகத் தெரிவித்துள்ளார்.

அதற்குப் பதிலாக, கட்டண உயர்வு இல்லாமல் போக்குவரத்துக் கழகங்களின் வருவாயைப் பெருக்குவதற்கும், இழப்புகளைக் குறைப்பதற்கும் தேவையான மாற்று உத்திகளையும், தகுந்த நடவடிக்கைகளையும் மேற்கொள்ளுமாறு போக்குவரத்துத் துறை அமைச்சருக்கும், அதிகாரிகளுக்கும் அறிவுறுத்தியுள்ளார்.

ஏற்கனவே, தமிழகம் முழுவதும் அனைத்து அரசுப் பேருந்துகளிலும் மகளிருக்குக் கட்டணமில்லாப் பயணத் திட்டத்தை விரிவுபடுத்துவது மற்றும் போக்குவரத்துத் துறையை நவீனப்படுத்துவது குறித்து முதலமைச்சர் தலைமையில் தொடர் ஆய்வுக் கூட்டங்கள் நடத்தப்பட்டு வருகின்றன. அண்மையில் தான் மாநிலத்தின் பல்வேறு கோட்டங்களுக்காக 300 புதிய அரசுப் பேருந்துகளின் சேவைகளை முதல்வர் தொடங்கி வைத்திருந்தார்.

மேலும், இனிவரும் காலங்களில் தமிழக அரசுப் போக்குவரத்து கழகங்களால் வாங்கப்படும் புதிய பேருந்துகள் அனைத்தும் குளிரூட்டப்பட்ட வசதியுடன் பொதுமக்களின் வசதிக்காகத் தரம் உயர்த்தப்பட வேண்டும் என்றும் அரசு அண்மையில் முடிவெடுத்திருந்தது. இந்தச் சூழ்நிலையில், தற்போதைய அமைச்சரவைக் கூட்டத்தில் கட்டண உயர்வுக்கு முட்டுக்கட்டைப் போட்டு, மாற்று வழிகளில் வருவாயை ஈட்ட முதல்வர் அறிவுறுத்தியிருப்பது பொதுமக்கள் மற்றும் தினசரிப் பயணிகள் மத்தியில் பெரும் வரவேற்பைப் பெற்றுள்ளது.