மதுரை மாவட்டம் அருள்மிகு திருப்பரங்குன்றம் சுப்பிரமணிய சுவாமி திருக்கோவிலில் மிகவும் விசேஷமான பங்குனிப் பெருவிழா இன்று அதிகாலையில் கொடியேற்றத்துடன் தொடங்குகியது. அதிகாலையில் அரோகரா கோஷம் விண்ணதிர கொடியேற்றம் நடைபெற்றது. இன்று முதல் அடுத்து வரும் 15 நாட்களுக்கான விழாவின் முக்கிய நிகழ்வுகள் குறித்த அட்டவணை வெளியிடப்பட்டுள்ளது. 

முருகப்பெருமானின் அறுபடை வீடுகளில் முதல் படை வீடான திருப்பரங்குன்றத்தில், பங்குனித் திருவிழா நாளை தொடங்கி ஏப்ரல் 6-ஆம் தேதி வரை நடைபெற உள்ளது. பதினைந்து நாட்கள் நடைபெறும் இவ்விழாவில் ஒவ்வொரு நாளும் சுவாமி பல்வேறு வாகனங்களில் வீதி உலா வருவார்.

கோவிலிலேயே அதிக எடை கொண்ட வெள்ளி யானை வாகனத்தில் முருகப்பெருமானைச் சீர்பாதங்கள் மற்றும் பக்தர்கள் கைகளிலேயே சுமந்து செல்வது கண்கொள்ளாக் காட்சியாக இருக்கும். அன்று பக்தர்களுக்குச் சிறப்புப் பிரசாதமாகச் சந்தனம் வழங்கப்படும்.

இந்த விழாவிற்காக மதுரை மீனாட்சி அம்மன் கோவிலில் இருந்து பிரியாவிடையுடன் சுந்தரேசுவரர் மற்றும் மீனாட்சி அம்மன் திருப்பரங்குன்றம் எழுந்தருளுவது தனிச்சிறப்பாகும். ஏப்ரல் 4ம் தேதி திருக்கல்யாணம் நடைபெற உள்ளது.  பங்குனி உத்திரத் திருவிழாவின் உச்ச நிகழ்வாகப் பிரம்மாண்டத் தேரோட்டம் ஏப்ரல் 5ம் தேதி  நடைபெறும். இதில் ஆயிரக்கணக்கான பக்தர்கள் கலந்துகொண்டு வடம் பிடித்து இழுப்பார்கள்.