இமயமலைப் பகுதியில் அமைந்துள்ள திபெத்தில் நேற்று ஒரே நாளில் அடுத்தடுத்து இரண்டு முறை நிலநடுக்கம் ஏற்பட்ட சம்பவம் அப்பகுதி மக்களிடையே பெரும் பீதியைக் கிளப்பியுள்ளது. கடந்த ஆண்டு ஏற்பட்ட பயங்கர நிலநடுக்கத்தின் வடுக்கள் இன்னும் ஆறாத நிலையில், இந்த நில அதிர்வுகள் மக்களைக் கவலையடையச் செய்துள்ளன.

தேசிய நில அதிர்வு மையம் வெளியிட்டுள்ள தரவுகளின்படி, திபெத்தின் பல்வேறு பகுதிகளில் நேற்று இந்த நில அதிர்வுகள் உணரப்பட்டுள்ளன. நேற்று அதிகாலை 4:17 மணிக்கு (இந்திய நேரப்படி) முதல் நிலநடுக்கம் ஏற்பட்டது. இது ரிக்டர் அளவுகோலில் 3.3 ஆகப் பதிவானது. அடுத்த சில மணி நேரங்களிலேயே, அதாவது காலை 9:28 மணிக்கு, இரண்டாவது நிலநடுக்கம் ஏற்பட்டது. இது ரிக்டர் அளவுகோலில் 4.2 ஆகப் பதிவானது. இரண்டு நிலநடுக்கங்களும் சுமார் 10 கி.மீ ஆழத்திலேயே ஏற்பட்டதால், நில அதிர்வுகள் மேலோட்டமாக உணரப்பட்டன.

இந்த அடுத்தடுத்த நிலநடுக்கங்களால் ஏற்பட்ட உயிர்ச் சேதம் அல்லது கட்டிடச் சேதங்கள் குறித்த அதிகாரப்பூர்வத் தகவல்கள் இதுவரை வெளியாகவில்லை. இருப்பினும், உயரமான மலைப் பகுதிகளில் வசிக்கும் மக்கள் வீடுகளை விட்டு வெளியேறி பாதுகாப்பான இடங்களில் தஞ்சம் புகுந்தனர்.

திபெத் மற்றும் இமயமலைப் பிராந்தியம் எப்போதும் நிலநடுக்க அபாயம் கொண்ட 'சீஸ்மிக் ஸோன்' பகுதியில் அமைந்துள்ளது. சரியாக ஓராண்டிற்கு முன்பு, அதாவது 2025 ஜனவரி 7-ஆம் தேதி திபெத்தின் ஷிகாட்சே பகுதியில் 7.1 ரிக்டர் அளவில் மிக பயங்கர நிலநடுக்கம் ஏற்பட்டது. இதில் 126 பேர் உயிரிழந்தனர் மற்றும் ஆயிரக்கணக்கான வீடுகள் இடிந்து விழுந்தன. அந்தப் பேரழிவின் பாதிப்புகளிலிருந்து மக்கள் மீண்டு வரும் வேளையில், தற்போதைய இந்த நில அதிர்வுகள் மீண்டும் அச்சத்தில் ஆழ்த்தியுள்ளன.

இந்தியப் புவித்தட்டானது, யூரேசிய புவித்தட்டோடு மோதுவதால் இமயமலைப் பிராந்தியத்தில் தொடர்ந்து நில அதிர்வுகள் ஏற்படுகின்றன. பிப்ரவரி 9-ஆம் தேதி முதல் இதுவரை சிக்கிம்-நேபாளம்-திபெத் பிராந்தியத்தில் மட்டும் சுமார் 57 முறை சிறு நில அதிர்வுகள் பதிவாகியுள்ளதாக நில அதிர்வு நிபுணர்கள் தெரிவிக்கின்றனர்.