பேரழிவு...  வேகமாகப் பரவும் எபோலா வைரஸ்... 1000ஐ நெருங்கிய பலி எண்ணிக்கை!

மத்திய கிழக்கு ஆப்பிரிக்க நாடான காங்கோவில் அதிதீவிரமாகப் பரவி வரும் எபோலா வைரஸ் தொற்றால் அங்குப் பெரும் சுகாதார நெருக்கடி ஏற்பட்டுள்ளது. உலகிலேயே மிகக் கொடிய நோய்களில் ஒன்றாகக் கருதப்படும் இந்த எபோலா வைரஸ், காங்கோ மட்டுமின்றி உகாண்டா, லைபீரியா போன்ற அயல் நாடுகளிலும் பரவி வருகிறது. வைரஸ் பரவலைத் தடுக்கும் நோக்கில் அமெரிக்கா உள்ளிட்ட பல்வேறு நாடுகள் காங்கோ உடனான விமானப் போக்குவரத்துகளுக்குக் கடுமையான கட்டுப்பாடுகளை விதித்துள்ளன. இருப்பினும் நோய்த்தொற்றின் வீரியம் குறையாமல் நாளுக்கு நாள் மக்களிடையே வேகமாகப் பரவி வருவது உலக நாடுகளைப் பெரும் பீதியில் ஆழ்த்தியுள்ளது.

காங்கோவில் இதுவரை 2,473 பேருக்கு எபோலா வைரஸ் தொற்று உறுதி செய்யப்பட்டுள்ளதாக அந்நாட்டு அரசு அதிகாரப்பூர்வமாகத் தெரிவித்துள்ளது. மேலும் இந்த கொடிய வைரஸ் பாதிப்பால் உயிரிழந்தவர்களின் எண்ணிக்கை 999 ஆக உயர்ந்து ஆயிரத்தை நெருங்கியுள்ளதாக அந்நாட்டுச் சுகாதாரத்துறை அறிவித்துள்ளது. நோயாளிக்கு ஏற்படும் வாந்தி மற்றும் இரத்தம் உள்ளிட்ட உடல் திரவங்கள் வழியாக இந்த நோய் மற்றவர்களுக்கு மிக எளிதாகப் பரவுகிறது. நோயாளிகளின் எண்ணிக்கை கணிசமாக உயர்ந்து வருவதால் வைரஸ் பரவலைக் கட்டுப்படுத்த முடியாமல் காங்கோ சுகாதாரத்துறை திணறி வருகிறது.

பெரும்பாலும் உயிரைப் பறிக்கும் இந்தக் கொடிய நோய்த்தொற்றைக் கட்டுப்படுத்தச் சர்வதேச மருத்துவ அமைப்புகளின் உதவியை காங்கோ நாடு நாடியுள்ளது. பாதிக்கப்பட்ட பகுதிகளுக்குத் தடுப்பூசிகள் மற்றும் அவசர சிகிச்சை உபகரணங்களை அனுப்ப உலக சுகாதார அமைப்பு தீவிர நடவடிக்கைகளை மேற்கொண்டு வருகிறது. இருப்பினும் நோயின் தீவிரம் அதிகமாக இருப்பதால் அந்நாட்டு மக்கள் வீடுகளை விட்டு வெளியேற அஞ்சிப் பெரும் பயத்துடன் வாழ்ந்து வருகின்றனர்.