நாளையுடன் தேர்தல் பிரச்சாரம் ஓய்வு... அர்ச்சனா பட்நாயக் கிடுக்கிப்பிடி விதிமுறைகள்! 

தமிழக சட்டமன்றத் தேர்தலுக்கான முன்னேற்பாடுகள் தீவிரமடைந்துள்ள நிலையில், அரசியல் கட்சிகள் மற்றும் வேட்பாளர்களுக்கான புதிய தேர்தல் பிரசார விதிமுறைகளைத் தமிழக தலைமைத் தேர்தல் அதிகாரி அர்ச்சனா பட்நாயக் வெளியிட்டுள்ளார். தேர்தல் நியாயமாகவும் சுதந்திரமாகவும் நடப்பதை உறுதி செய்யும் வகையில், 'தேர்தல் கையேடு 2026' என்ற வழிகாட்டி நெறிமுறைகளை அவர் சென்னையில் அறிமுகப்படுத்தினார். தேர்தல் நடத்தை விதிகள் அமலில் இருப்பதால், பொதுக்கூட்டங்கள் மற்றும் ஊர்வலங்கள் நடத்துவதற்கு முன்பே உரிய அனுமதி பெறுவது கட்டாயமாக்கப்பட்டுள்ளது.

குறிப்பாக, 5,000-க்கும் மேற்பட்டோர் பங்கேற்கும் பிரசாரக் கூட்டங்களுக்கு அனுமதி பெறுவதற்கான நடைமுறைகளில் சில மாற்றங்கள் செய்யப்பட்டுள்ளன. பிரசாரத்தின் போது ஒலிபெருக்கிகள் பயன்படுத்துதல், சுவர் விளம்பரங்கள் மற்றும் வாகனப் பேரணிகளுக்குக் கடும் கட்டுப்பாடுகள் விதிக்கப்பட்டுள்ளன. வேட்பாளர்களின் தேர்தல் செலவினங்களைக் கண்காணிக்கத் தனிக்குழுக்கள் அமைக்கப்பட்டுள்ளதாகவும், விதியை மீறும் கட்சிகள் மீது கடும் நடவடிக்கை எடுக்கப்படும் என்றும் அவர் எச்சரித்துள்ளார். அரசியல் கட்சிகள் தங்கள் கோரிக்கைகளை இணையதளம் வாயிலாகவே சமர்ப்பிக்க வழிவகை செய்யப்பட்டுள்ளது.

தேர்தல் அமைதியாக நடைபெறுவதை உறுதி செய்யக் காவல் துறையினருடன் இணைந்து விரிவான பாதுகாப்புத் திட்டங்கள் வகுக்கப்பட்டுள்ளன. பதற்றமான வாக்குச் சாவடிகளில் கூடுதல் கண்காணிப்பு கேமராக்கள் பொருத்தவும், துணை ராணுவப் படையினரை ஈடுபடுத்தவும் ஆலோசிக்கப்பட்டு வருகிறது. வாக்காளர்களுக்குப் பணம் அல்லது பரிசுப் பொருட்கள் விநியோகிப்பதைத் தடுக்க மாநிலம் முழுவதும் பறக்கும் படைகள் 24 மணி நேரமும் தீவிர சோதனையில் ஈடுபடும் என்று அர்ச்சனா பட்நாயக் தெரிவித்துள்ளார். இந்த புதிய கட்டுப்பாடுகளால் தமிழக அரசியல் களம் தற்போது மிகுந்த பரபரப்புடன் காணப்படுகிறது.