அனில் அம்பானி குழும நிறுவனங்களுக்கு எதிராக மத்திய புலனாய்வு அமைப்பு மற்றும் அமலாக்கத்துறை ஆகியவை நடத்தி வரும் பிரம்மாண்ட பண மோசடி மற்றும் கடன் முறைகேடு விசாரணையில்,  மேலும் 1,021 கோடி ரூபாய் மதிப்பிலான சொத்துக்களை அமலாக்கத்துறை முடக்கியுள்ளது.

சில ஆண்டுகளுக்கு முன்பு அனில் அம்பானி குழுமத்தைச் சேர்ந்த நிறுவனங்கள், பொதுத்துறை வங்கிகளில் பெற்ற பெருந்தொகை கடன்களை எதற்காகப் பெற்றனவோ அந்த நோக்கத்திற்குப் பயன்படுத்தாமல், முறைகேடாக வேறு தேவைகளுக்குப் பயன்படுத்தியதாக இந்திய ஸ்டேட் வங்கி புகார் அளித்தது. இந்த புகாரின் அடிப்படையில் சி.பி.ஐ. முதற்கட்ட விசாரணையைத் தொடங்கி முதல் தகவல் அறிக்கை பதிவு செய்தது. அதனைத் தொடர்ந்து, இந்த வழக்கில் பெரிய அளவில் சட்டவிரோத பணப்பரிமாற்றம் நடந்திருப்பதை அறிந்த அமலாக்கத்துறை, சட்டவிரோத பணப்பரிமாற்றத் தடுப்புச் சட்டத்தின் கீழ் தனியாக வழக்குப் பதிவு செய்து தீவிர விசாரணையில் இறங்கியது.

அமலாக்கத்துறையின் விசாரணையில் அனில் அம்பானி குழுமத்தின் கீழ் செயல்படும் முக்கிய நிறுவனங்களான ரிலையன்ஸ் ஹோம் பைனான்ஸ், ரிலையன்ஸ் கமர்ஷியல் பைனான்ஸ் ஆகிய நிறுவனங்கள் பொதுமக்களிடமிருந்தும், வங்கிகளிடமிருந்தும் திரட்டிய சுமார் 15,548 கோடி ரூபாய் நிதியை விதிமுறைகளை மீறி, முறைகேடான வழிகளில் வேறு பயன்பாடுகளுக்குத் திருப்பிவிட்டது கண்டுபிடிக்கப்பட்டுள்ளது.

இந்த அடுக்கடுக்கான நிதி மோசடி வழக்கின் தொடர்ச்சியாக,  ரிலையன்ஸ் இன்பிராஸ்ட்ரக்சர் நிறுவனம் தன் வசம் வைத்திருந்த ரிலையன்ஸ் பவர் நிறுவனத்தின் பங்குகள் உள்ளிட்ட 1,021 கோடி ரூபாய் மதிப்பிலான அசையும் மற்றும் அசையா சொத்துக்களை அமலாக்கத்துறை முடக்கியுள்ளது.

இந்த இமாலய நிதி முறைகேடு வழக்கில் அமலாக்கத்துறை இதுவரை மேற்கொண்டுள்ள தற்போதைய நடவடிக்கையையும் சேர்த்து, இந்த ஒரே வழக்கில் இதுவரை மொத்தம் 20,367 கோடி ரூபாய் மதிப்பிலான அனில் அம்பானி குழுமத்தின் சொத்துக்கள் அமலாக்கத்துறையால் முழுமையாக முடக்கப்பட்டுள்ளன.

இந்த வழக்கில் இதுவரை சைபர் மற்றும் நிதிப் பிரிவினரால் 8 பேர் கைது செய்யப்பட்டுள்ளனர். மேலும், நீதிமன்றத்தில் 4 முக்கியக் குற்றப்பத்திரிகைகள் தாக்கல் செய்யப்பட்டுள்ளன.  இதுதவிர, அந்நிய செலாவணி மேலாண்மைச் சட்டத்தின்கீழ் தனியாக 77.86 கோடி ரூபாய் மதிப்பிலான சொத்துக்களும் இந்த குழுமத்திடமிருந்து முடக்கப்பட்டுள்ளது குறிப்பிடத்தக்கது. அமலாக்கத்துறையின் இந்த தொடர்  நடவடிக்கைகளால் அனில் அம்பானி குழுமம்  மிகப்பெரிய சட்ட மற்றும் பொருளாதார நெருக்கடிக்குத் தள்ளப்பட்டுள்ளது.