மத்திய அரசுப் பணியாளர் தேர்வாணையம் நடத்தும் சிவில் சர்வீஸ் உள்ளிட்ட அனைத்து வகையான அரசு போட்டித் தேர்வுகளிலும் இனி ஆள்மாறாட்டத்தைத் தடுத்து, முறைகேடுகளுக்கு முற்றுப்புள்ளி வைக்கும் வகையில் 'நிகழ்நேர முக அடையாள சரிபார்ப்பு' தொழில்நுட்பத்தை நாடு முழுவதும் கொண்டு வர மத்திய அரசு திட்டம் தீட்டியுள்ளது.

மத்திய அரசுப் பணியாளர் தேர்வாணையம் கடந்த மே மாதம் 24-ம் தேதி நடத்திய குடிமைப் பணிகள் மற்றும் இந்திய வனப் பணி முதல்நிலைத் தேர்வுகளில், இந்த அதிநவீன தொழில்நுட்பம் சோதனை முறையில் முதல் முறையாக நாடு முழுவதும் வெற்றிகரமாகச் செயல்படுத்தப்பட்டது.

நாடு முழுவதும் அமைக்கப்பட்டிருந்த 2,072 தேர்வு மையங்களில் தேர்வு எழுத வந்த சுமார் 5.5 லட்சம் தேர்வர்களின் உண்மையான அடையாளம் இந்தத் தொழில்நுட்பத்தின் மூலம் துல்லியமாக நேரடியாகச் சரிபார்க்கப்பட்டது.

விண்ணப்பதாரர்கள் தங்களது தேர்வு விண்ணப்பத்தைச் சமர்ப்பிக்கும் போது பதிவேற்றிய புகைப்படமும், தேர்வு எழுத நேரடியாகத் தேர்வு மையத்திற்கு வந்துள்ள நபரின் முகமும் ஒன்றுதானா? என்பதை இந்தத் தொழில்நுட்பம் நொடிப் பொழுதில் துல்லியமாக உறுதி செய்கிறது. இதற்கென பிரத்யேகமாக உருவாக்கப்பட்ட ஒரு மொபைல் செயலி பயன்படுத்தப்பட்டது. இந்த மெகா சரிபார்ப்புப் பணியில் ஒரே நேரத்தில் நாடு முழுவதும் 7 ஆயிரத்திற்கும் மேற்பட்ட கண்காணிப்பாளர்கள் ஈடுபடுத்தப்பட்டனர்.

தேர்வு மையங்களில் இந்த புதிய முக அடையாளச் சரிபார்ப்பு முறையால் எவ்விதக் காலதாமதமும், குழப்பமும் ஏற்படாதவாறு சிறப்பு ஏற்பாடுகள் செய்யப்பட்டிருந்தன.

ஒரு தேர்வரின் முக அடையாளத்தை இந்தச் செயலி மூலம் சரிபார்க்கச் சராசரியாக 6 முதல் 8 வினாடிகள் மட்டுமே எடுத்துக்கொண்டது. இதன் மூலம் நாடு முழுவதும் ஒரு நிமிடத்திற்குச் சுமார் 12,000 முக அடையாளச் சரிபார்ப்புகள் மின்னல் வேகத்தில் மேற்கொள்ளப்பட்டன. இதனால் தேர்வு எழுத வந்த மாணவ, மாணவிகள் நீண்ட வரிசையில் காத்திருப்பது முழுமையாகத் தவிர்க்கப்பட்டது.

இது குறித்து மத்திய அரசுப் பணியாளர் தேர்வாணையத்தின் தலைவர் அஜய் குமார் கூறுகையில், "எந்தவித ஆள்மாறாட்டமும் இல்லாத, முற்றிலும் தூய்மையான மற்றும் நேர்மையான தேர்வுகளை நாடு முழுவதும் உறுதி செய்வதே எங்களின் முக்கிய நோக்கம். மின்னணு மற்றும் தகவல் தொழில்நுட்ப அமைச்சகத்தின் கீழ் செயல்படும் தேசிய மின் ஆளுமை பிரிவின் உதவியுடன், இந்த அதிநவீன தொழில்நுட்பம் முழுமையாக நமது இந்தியாவிலேயே உள்நாட்டிலேயே உருவாக்கப்பட்டது" என்று பெருமிதத்துடன் தெரிவித்துள்ளார்.

குடிமைப் பணித் தேர்வுகளில் இந்த முகசரிபார்ப்பு நடைமுறை 100 விழுக்காடு மிகப்பெரிய வெற்றியைப் பெற்றுள்ளதைத் தொடர்ந்து, வரும் காலங்களில் மத்திய மற்றும் மாநில அரசுகள் நடத்தும் மற்ற அனைத்து விதமான அரசுப் போட்டித் தேர்வுகளிலும் (பணியாளர் தேர்வாணையம், ரயில்வே வாரியம், வங்கித் தேர்வுகள் போன்றவை) இந்த 'ஃபேஸ் ஐடி' சரிபார்ப்பு முறையை முழுமையாக நடைமுறைப்படுத்த மத்திய அரசு தற்பொழுது தீவிரமாக முடிவு செய்துள்ளது.