திறப்பு விழாவிற்கு முன்பே விபரீதம்! பிரதமர் மோடி திறந்து வைக்கவிருந்த எண்ணெய் சுத்திகரிப்பு நிலையத்தில் பயங்கர தீவிபத்து... பரபரப்பு வீடியோ!
ராஜஸ்தான் மாநிலம் பார்மர் மாவட்டத்தில், பிரதமர் நரேந்திர மோடி அவர்களால் விரைவில் திறந்து வைக்கப்பட இருந்த பிரம்மாண்ட எண்ணெய் சுத்திகரிப்பு நிலையத்தில் இன்று திடீரென பயங்கர தீ விபத்து ஏற்பட்டது. எச்.பி.சி.எல். (HPCL) நிறுவனத்திற்குச் சொந்தமான இந்த சுத்திகரிப்பு நிலையத்தின் ஒரு பகுதியில், பணிகள் நடந்து கொண்டிருந்தபோது எதிர்பாராதவிதமாகத் தீப்பிடித்தது. சில நிமிடங்களிலேயே தீ மளமளவெனப் பரவி, வானுயரத்திற்கு கரும்புகை சூழ்ந்ததால் அந்தப் பகுதியே போர்க்களம் போலக் காட்சியளித்தது.
சம்பவம் குறித்துத் தகவல் அறிந்தவுடன், சுத்திகரிப்பு நிலையத்தின் பாதுகாப்புப் படையினரும், தீயணைப்புத் துறையினரும் விரைந்து வந்து தீயை அணைக்கும் பணியில் ஈடுபட்டனர். பல மணி நேரப் போராட்டத்திற்குப் பிறகு தீ ஓரளவுக் கட்டுப்பாட்டுக்குள் கொண்டு வரப்பட்டது. இந்த விபத்தின் போது அங்கு பணியில் இருந்த ஊழியர்கள் பாதுகாப்பாக வெளியேற்றப்பட்டதால், நல்வாய்ப்பாகப் பெரும் உயிர்ச் சேதம் தவிர்க்கப்பட்டதாக முதற்கட்ட தகவல்கள் தெரிவிக்கின்றன. இருப்பினும், பல கோடி ரூபாய் மதிப்பிலான இயந்திரங்கள் மற்றும் கட்டுமானப் பொருட்கள் சேதமடைந்திருக்கலாம் என அஞ்சப்படுகிறது.
இந்த எண்ணெய் சுத்திகரிப்பு நிலையம் பிரதமரின் கனவுத் திட்டங்களில் ஒன்றாகக் கருதப்படும் நிலையில், அதன் திறப்பு விழாவிற்கான ஏற்பாடுகள் தீவிரமாக நடந்து வந்தன. இத்தகைய சூழலில் நடந்த இந்தத் தீ விபத்து குறித்து உயர்மட்ட விசாரணைக்கு உத்தரவிடப்பட்டுள்ளது. விபத்துக்கான காரணம் மின்கசிவா அல்லது வேறு ஏதேனும் கவனக்குறைவா என்பது குறித்து அதிகாரிகள் தீவிரமாக ஆய்வு செய்து வருகின்றனர். இந்தச் சம்பவத்தால் அந்தப் பகுதியில் பெரும் பரபரப்பு நிலவி வருகிறது.