நெகிழ்ச்சி... பொதுத்தேர்வில் சாதனை...  அரசு பள்ளி மாணவியை விமானத்தில் அழைத்துச்சென்ற ஆசிரியை!

நாகர்கோவில் அனந்தநாடார்குடி அரசு மேல்நிலைப்பள்ளியில் தாவரவியல் ஆசிரியராகப் பணியாற்றும் மலர்விழி, பொதுத்தேர்வில் அதிக மதிப்பெண் பெறும் மாணவரைத் தனது சொந்தச் செலவில் விமானத்தில் அழைத்துச் செல்வதாக வாக்குறுதி அளித்திருந்தார். ஆசிரியரின் இந்த ஊக்கத்தைப் பயன்படுத்தி சிறப்பாகப் படித்த மாணவி மகிழா, தாவரவியல் பாடத்தில் அதிக மதிப்பெண்கள் பெற்று சாதனை படைத்தார். கொடுக்கப்பட்ட வாக்கின்படி அந்த மாணவியை ஆசிரியை விமானத்தில் அழைத்துச் சென்று தனது பெருந்தன்மையை வெளிப்படுத்தியுள்ளார்.

இதன்படி கடந்த மாதம் 23-ந்தேதி நாகர்கோவிலில் இருந்து திருவனந்தபுரத்திற்கு மாணவியை அழைத்துச் சென்று அங்கிருந்து ஐதராபாத்திற்கு விமானப் பயணம் மேற்கொண்டனர். பின்னர் அங்கிருந்து மற்றொரு விமானத்தில் சென்னை வந்தடைந்த அவர்கள், அதன் பிறகு ஏ.சி. ரெயில் மூலம் நாகர்கோவிலுக்குத் திரும்பி வந்தனர். மாணவியின் கனவாக இருந்த விமானப் பயணத்தை நிறைவேற்றிய இந்த நிகழ்வு அனைவரையும் நெகிழ்ச்சியடையச் செய்துள்ளது.

தமது சொந்தச் செலவில் மாணவியை ஊக்கப்படுத்திய ஆசிரியை மலர்விழியின் செயலுக்குத் தலைமை ஆசிரியர் மற்றும் கல்வியாளர்கள் பலரும் பாராட்டுக்களைத் தெரிவித்து வருகின்றனர். அரசுப் பள்ளி மாணவர்களின் திறனை வெளிக்கொணர இதுபோன்ற ஆசிரியர்களின் ஊக்க நடவடிக்கைகள் மிகப்பெரிய அளவில் உதவிகரமாக அமைகின்றன. முதன்முறையாக விமானத்தில் பயணம் செய்த மாணவி மகிழா தனது மகிழ்ச்சியையும் நன்றியையும் மனநிறைவுடன் பகிர்ந்து கொண்டுள்ளார்.