திமுகவின் முக்கியப் புள்ளியும், முன்னாள் பொதுப்பணி மற்றும் நெடுஞ்சாலைத்துறை அமைச்சருமான எ.வ.வேலுவுக்குத் தமிழக லஞ்ச ஒழிப்புத்துறை விசாரணை சம்மன் அனுப்பியுள்ளது. தமிழ்நாட்டில் முதலமைச்சர் விஜய் தலைமையிலான தவெக அரசு பொறுப்பேற்ற பிறகு, முந்தைய திமுக ஆட்சி மீதான முதல் பெரிய ஊழல் தடுப்பு நடவடிக்கையாக இது பார்க்கப்படுகிறது. நெடுஞ்சாலைத்துறை முறைகேடு வழக்கில் தங்களது அடுத்தகட்ட நகர்வாக லஞ்ச ஒழிப்புத்துறை இந்தச் சம்மனை அனுப்பியுள்ளது:

கடந்த 2022-ஆம் ஆண்டு 'அறப்போர் இயக்கம்' அமைப்பின் ஒருங்கிணைப்பாளர் ஜெயராம் வெங்கடேசன் அளித்த புகாரின் அடிப்படையில் இந்த நடவடிக்கை எடுக்கப்பட்டுள்ளது. தமிழக நெடுஞ்சாலைத்துறையில் குறிப்பிட்ட சில கிராமங்களில் சாலைகளை முழுமையாக அமைக்காமலேயே, பணிகள் முடிந்துவிட்டதாகக் போலி ஆவணங்கள் தயாரித்து, ஒப்பந்ததாரர்களுக்குச் சுமார் ₹3.23 கோடி அரசு நிதியை விடுவித்து முறைகேடு செய்ததாக எ.வ.வேலு மற்றும் அதிகாரிகள் மீது குற்றம் சாட்டப்பட்டுள்ளது.

இந்த வழக்கின் தொடர்ச்சியாக, கடந்த வாரம் (ஜூன் 25, வியாழக்கிழமை) சென்னை மற்றும் திருவண்ணாமலையில் உள்ள எ.வ.வேலுவின் இல்லங்கள், அவருக்குச் சொந்தமான கல்வி நிறுவனங்கள் மற்றும் நெடுஞ்சாலைத்துறை அலுவலகங்கள் என மாநிலம் முழுவதும் 20 இடங்களில் லஞ்ச ஒழிப்புத்துறையினர் ஒரே நேரத்தில்  சோதனை நடத்தினர்.

இந்தச் சோதனையின் போது, கணக்கில் காட்டப்படாத ₹40 லட்சம் ரொக்கப் பணம், வழக்கிற்குத் தேவையான முக்கிய டிஜிட்டல் ஆவணங்கள் மற்றும் நெடுஞ்சாலைத்துறை சார்ந்த கோப்புகள் அதிகாரிகளால் பறிமுதல் செய்யப்பட்டன.

கைப்பற்றப்பட்ட ஆவணங்கள் மற்றும் மின்னணு ஆதாரங்களின் அடிப்படையில் எ.வ.வேலுவிடம் நேரடி விசாரணை நடத்த லஞ்ச ஒழிப்புத்துறை முடிவு செய்துள்ளது. சென்னையில் உள்ள லஞ்ச ஒழிப்புத்துறை தலைமை அலுவலகத்தில் நேரில் ஆஜராகி, கைப்பற்றப்பட்ட பணம் மற்றும் ஆவணங்கள் குறித்து விளக்கம் அளிக்குமாறு சம்மனில் குறிப்பிடப்பட்டுள்ளது.

இருப்பினும், இது முதற்கட்ட விசாரணை என்பதால் இப்போதைக்கு அவர் கைது செய்யப்படுவதற்கான வாய்ப்புகள் இல்லை என்றும், விசாரணைக்குப் பிறகே அடுத்தகட்ட நடவடிக்கைகள் குறித்துத் தீர்மானிக்கப்படும் என்றும் சட்டப் பிரிவு வட்டாரங்கள் தெரிவிக்கின்றன.

ஆளுங்கட்சியான தவெக, முந்தைய அரசின் ஊழல்களை வெளிக்கொண்டு வருவோம் என்று உறுதியளித்த சில நாட்களிலேயே இந்த  சோதனை மற்றும் சம்மன் நகர்வுகள் நடந்துள்ளன.

மறுபுறம், இந்த லஞ்ச ஒழிப்புத்துறை நடவடிக்கைக்குக் கடும் கண்டனம் தெரிவித்துள்ள திமுக தலைவர் ஸ்டாலின், இது முற்றிலும் 'அரசியல் பழிவாங்கும் நடவடிக்கை' என்றும், இந்த வழக்கை எ.வ.வேலு சட்ட ரீதியாக எதிர்கொண்டு தனது நிரபராதித் தன்மையை நிரூபிப்பார் என்றும் எக்ஸ் தளத்தில் பதிவிட்டுள்ளார். திமுக சட்டமன்றக் கொறடாவாகவும் இருக்கும் எ.வ.வேலுவுக்குச் சம்மன் அனுப்பப்பட்டிருப்பது தமிழக அரசியல் களத்தில் பெரும் பரபரப்பை ஏற்படுத்தியுள்ளது.