எம்.ஜி.ஆர் அமைச்சரவையில் இடம்பெற்ற ஒரத்தநாடு முன்னாள் எம்.எல்.ஏ வீராசாமி காலமானார்!

தஞ்சாவூர் மாவட்டம் பாப்பநாடு அருகே உள்ள வெள்ளூர் பெரியகுமுளை கிராமத்தைச் சேர்ந்த தா. வீராசாமி (88), கல்வியாளராகத் தனது வாழ்க்கையைத் தொடங்கி, தமிழக அரசியலில் ஒரு முக்கிய இடத்தைப் பிடித்தவர். ஒரு பட்டதாரியான இவர், பேராசிரியராகப் பணியாற்றிய அனுபவம் கொண்டவர். பின்னர் பொதுவாழ்வில் ஈடுபாடு கொண்டு, 1971-ம் ஆண்டு வெள்ளூர் பஞ்சாயத்துத் தலைவராகத் தேர்ந்தெடுக்கப்பட்டார்.

முதலில் திமுகவில் இருந்த இவர், 1972-ல் எம்.ஜி.ஆர் அவர்கள் அ.தி.மு.க-வைத் தொடங்கியபோது, அவர் மீது கொண்ட ஈர்ப்பால் கட்சியில் இணைந்தார். கட்சியின் வளர்ச்சிக்கு அடித்தளமிட்டவர்களில் ஒருவரான இவர், ஒன்றிய அமைப்பாளராகப் பதவி வகித்தார். ஒரத்தநாடு சட்டமன்றத் தொகுதியில் 1980 மற்றும் 1984 ஆகிய ஆண்டுகளில் நடைபெற்ற தேர்தல்களில் அ.தி.மு.க சார்பில் போட்டியிட்டுத் தொடர்ந்து இரண்டு முறை வெற்றி பெற்றார்.

இவரது திறமையைப் பாராட்டி, எம்.ஜி.ஆர் அவர்கள் தனது அமைச்சரவையில் இவரை உணவு மற்றும் வணிகவரித்துறை அமைச்சராக நியமித்தார். எம்.ஜி.ஆர் காலத்திற்குப் பிறகு அரசியலில் இருந்து ஓய்வு பெற்றுத் தனது சொந்த ஊரில் வசித்து வந்தார். கடந்த இரண்டு ஆண்டுகளாக வயது மூப்பு தொடர்பான உடல்நலக் குறைவால் பாதிக்கப்பட்டு சிகிச்சையில் இருந்த அவர், நேற்று அதிகாலை காலமானார்.

அவரது மறைவுக்கு அ.தி.மு.க நிர்வாகிகள், தொண்டர்கள் மற்றும் ஊர் பொதுமக்கள் நேரில் சென்று அஞ்சலி செலுத்தி வருகின்றனர். எளிமையானப் பேராசிரியராகத் தொடங்கி, ஒரு துறையின் அமைச்சராக உயர்ந்த அவரது வாழ்க்கை பலருக்கு முன்னுதாரணமாகத் திகழ்கிறது.