இந்தியாவில் மீண்டும் ஃபார்முலா 1 (F1) கார் பந்தயங்களை நடத்துவதற்கும், மோட்டார் ஸ்போர்ட்ஸ் துறையை மேம்படுத்துவதற்கும் மத்திய அரசு புதிய நடவடிக்கைகளை எடுத்துள்ளது. இதற்காக 10 பேர் கொண்ட உயர்மட்டக் குழு ஒன்றை மத்திய அரசு அதிகாரப்பூர்வமாக அமைத்துள்ளது.

வரும் 2028-ஆம் ஆண்டிற்குள் ஃபார்முலா 1 பந்தயத்தை வெற்றிகரமாக இந்தியாவிற்கு மீண்டும் கொண்டுவருவதை முக்கிய இலக்காகக் கொண்டு இந்த உயர்மட்டக் குழு செயல்படும் எனத் தெரிவிக்கப்பட்டுள்ளது. மோட்டார் ஸ்போர்ட்ஸ் தொடர்பான ஒழுங்குமுறைகள், உள்கட்டமைப்பு மேம்பாடுகள் மற்றும் சர்வதேச தரத்திலான பாதுகாப்பு ஏற்பாடுகள் குறித்து இக்குழு ஆராயும்.

முன்னதாக உத்தரப் பிரதேச மாநிலம் நொய்டாவில் உள்ள புகழ்பெற்ற புத்த சர்வதேச சுற்றில் கடந்த 2011 முதல் 2013 வரை மூன்று ஆண்டுகள் F1 பந்தயங்கள் வெற்றிகரமாக நடத்தப்பட்டன.

தொடக்க காலத்தில் பெரும் வரவேற்பைப் பெற்ற இந்தப் போட்டிகள், கடுமையான வரி விதிப்புச் சிக்கல்கள், இறக்குமதி வரிகள் மற்றும் சுங்கத்துறை தொடர்பான நிர்வாகச் சிக்கல்கள் காரணமாகத் தொடர முடியாமல் பாதியிலேயே கைவிடப்பட்டன.

தற்போது சர்வதேச அளவிலான முதலீடுகளை ஈர்க்கவும், விளையாட்டுத் துறையை மேம்படுத்தவும் மத்திய அரசு தீவிரம் காட்டி வருவதால், பல ஆண்டுகளுக்குப் பிறகு இந்தியாவில் F1 பந்தயங்கள் மீண்டும் தொடங்கும் என்ற எதிர்பார்ப்பு மோட்டார் ஸ்போர்ட்ஸ் ரசிகர்களிடையே எழுந்துள்ளது.