தமிழ் சினிமாவில் பெரிய பட்ஜெட் மற்றும் முன்னணி நட்சத்திரங்களின் திரைப்படங்கள் வெளியாகும் போது, முதல் ஒரு வாரத்திற்குப் கூடுதல் காட்சிகளைத் திரையிட அனுமதிக்க வேண்டும் என்று தயாரிப்பாளர்கள் மற்றும் திரையரங்கு உரிமையாளர்கள் சங்கம் சார்பில் நீண்ட காலமாகத் தமிழக அரசுக்குக் கோரிக்கைகள் வைக்கப்பட்டு வந்தன. இந்நிலையில், திரையுலகின் வாழ்வாதாரத்தை மேம்படுத்தும் நோக்கில், தமிழ்நாட்டிலுள்ள அனைத்துத் திரையரங்குகளிலும் தினசரி 5 காட்சிகள்  திரையிட அனுமதியளித்து முதலமைச்சர் விஜய் அதிரடி உத்தரவைப் பிறப்பித்துள்ளார்.

முதலமைச்சர் விஜய் அவர்களின் இந்த புதிய அதிகாரப்பூர்வ உத்தரவின்படி, தமிழ்நாட்டில் வெளியாகும் புதிய தமிழ்த் திரைப்படங்களுக்கு, அவை வெளியிடப்படும் முதல் நாளில் இருந்து தொடர்ந்து 7 நாட்களுக்குத் தினசரி 5 காட்சிகள் வரை திரையிடத் தியேட்டர்களுக்கு முழுமையான அனுமதி வழங்கப்பட்டுள்ளது.

புதிய திரைப்படங்கள் வெளியாகும் முதல் வாரம் மட்டுமன்றி, சாமானிய மக்கள் மற்றும் குடும்பங்கள் தியேட்டர்களுக்கு அதிகம் வருகை தரும் பின்வரும் முக்கிய நாட்களிலும் இந்த 5 காட்சிகள் நடைமுறைக்கு அனுமதி அளிக்கப்பட்டுள்ளது. வழக்கமான வார இறுதி நாட்கள்: அனைத்து சனிக்கிழமை மற்றும் ஞாயிற்றுக்கிழமைகளில் 5 காட்சிகள் திரையிடலாம். மாநிலத்தின் அனைத்துப் பொது விடுமுறை நாட்களிலும் கூடுதல் காட்சிக்கு அனுமதி. மாவட்ட வாரியாகக் கொண்டாடப்படும் பிராந்திய உள்ளூர் பண்டிகை நாட்களிலும் தியேட்டர்கள் 5 காட்சிகளைத் திரையிட்டுக் கொள்ளலாம்.

இதற்கு முன்பு, பண்டிகைக் காலங்களில் மட்டுமே சிறப்பு அனுமதியாக 5 காட்சிகள் வழங்கப்பட்டு வந்த நிலையில், அதனை முறைப்படுத்தி அரசாணையாகவே தவெக அரசு வெளியிட்டுள்ளது. அண்மையில் நடிகர் விஜய் சேதுபதி திரையரங்கு கட்டணங்களை உயர்த்தக் கோரி முதலமைச்சரிடம் கோரிக்கை வைத்திருந்த சூழலில்,  தியேட்டர்களின் வருவாயைப் பெருக்கும் வகையில் இந்த 5 காட்சிகள் உத்தரவு வெளியாகியுள்ளது கோலிவுட் வட்டாரத்தில் அசுர உற்சாகத்தை ஏற்படுத்தியுள்ளது.

இந்த வரலாற்றுச் சிறப்புமிக்க முடிவின் மூலம், தியேட்டர்களில் திருட்டுத்தனமாக அதிக விலைக்கு டிக்கெட்டுகள் விற்பனை செய்யப்படுவது முற்றிலும் தடுக்கப்படும் என்றும், தயாரிப்பாளர்கள் தங்களது முதலீட்டை முதல் வாரத்திலேயே அசுர வேகத்தில் எடுக்க இது ஒரு மிகப்பெரிய பக்கபலமாக இருக்கும் என்றும் தமிழ்த் திரைப்படத் தயாரிப்பாளர்கள் சங்கம் முதலமைச்சர் விஜய் அவர்களுக்குத் தங்களது நெஞ்சார்ந்த நன்றிகளைத் தெரிவித்து வருகிறது.