தமிழகத்தில் கடந்த சில நாட்களாக ஏற்ற இறக்கங்களுடன் காணப்பட்ட தங்கம் விலை, தற்போது மீண்டும் ராக்கெட் வேகத்தில் உயரத் தொடங்கியுள்ளது. குறிப்பாக கடந்த 8 நாட்களில் மட்டும் சவரனுக்கு ரூ.2,880 உயர்ந்து நகைப்பிரியர்களிடையே பெரும் அதிர்ச்சியை ஏற்படுத்தியுள்ளது.

சென்னையில் இன்று ஆபரணத் தங்கத்தின் (22 கேரட்) விலை சவரனுக்கு ரூ.1,280 உயர்ந்துள்ளது.

1 கிராம்: ரூ.14,220 (நேற்று ரூ.14,060) 1 சவரன்: ரூ.1,13,760

அதேபோல், 24 கேரட் சுத்தத் தங்கத்தின் விலை ஒரு சவரன் ரூ.1,19,448-க்கு விற்பனை செய்யப்படுகிறது.

கடந்த ஏப்ரல் 7-ஆம் தேதி ஒரு சவரன் தங்கம் ரூ.1,10,880-க்கு விற்கப்பட்டது. இடையில் ஈரான் - அமெரிக்கா இடையிலான போர் நிறுத்த அறிவிப்பால் விலை சற்று குறைந்தாலும், மீண்டும் சர்வதேச சந்தையில் நிலவும் பொருளாதார மாற்றங்களால் விலை மளமளவென உயரத் தொடங்கியுள்ளது.

அமெரிக்கா - ஈரான் இடையிலான அமைதிப் பேச்சுவார்த்தையில் நீடிக்கும் இழுபறி மற்றும் ஹார்மூஸ் ஜலசந்தியில் அமெரிக்காவின் கடல்சார் தடைகள் போன்றவற்றால் சர்வதேச சந்தையில் முதலீட்டாளர்கள் தங்கத்தின் மீது அதிக முதலீடு செய்து வருகின்றனர்.

கச்சா எண்ணெய் விலை உயர்வு மற்றும் டாலரின் மதிப்பு ஏற்ற இறக்கம் போன்றவற்றால் பாதுகாப்பான முதலீடாகத் தங்கத்தை மக்கள் கருதுகின்றனர். இந்தியாவில் தேவை: சித்திரை திருநாள் மற்றும் வரவிருக்கும் திருமண முகூர்த்த நாட்களை முன்னிட்டு இந்தியாவில் தங்கத்திற்கான தேவை அதிகரித்துள்ளதும் ஒரு முக்கியக் காரணியாகும்.