கடந்த திமுக ஆட்சிக் காலத்தில் சென்னை உள்ளிட்ட முக்கிய நகரங்களுக்காக, ஜெர்மனி வளர்ச்சி வங்கியின் நிதியுதவியுடன் 500 அதிநவீன மின்சார பேருந்துகளைக் கொள்முதல் செய்யக் கோரப்பட்டிருந்த சர்வதேச டெண்டரைத் தற்போதைய தவெக அரசு ரத்து செய்து உத்தரவிட்டுள்ளது. இந்த பழைய கொள்முதல் முறை அரசுக்குப் பெரிய அளவில் நிதி இழப்பை ஏற்படுத்தும் எனக் கணக்கிடப்பட்டதால் இந்த முடிவு எடுக்கப்பட்டுள்ளதாக அரசுத் தரப்பில் தெரிவிக்கப்பட்டுள்ளது.

முந்தைய திட்டத்தின்படி, வெளிநாட்டு வங்கியின் நிதியுதவியுடன் மின்சார பேருந்துகளை அரசே நேரடியாக விலைக்கு வாங்கி இயக்கத் திட்டமிடப்பட்டிருந்தது. ஆனால், மின்சார பேருந்துகளின் ஆரம்பக் கொள்முதல் விலை மிக அதிகம் என்பதாலும், அவற்றின் உள்கட்டமைப்பு மற்றும் பராமரிப்புச் செலவுகள் அரசுப் போக்குவரத்துக் கழகங்களுக்குக் கூடுதல் நிதிச் சுமையையும், இழப்பையும் உருவாக்கும் எனத் தற்போதைய தவெக அரசு மதிப்பிட்டுள்ளது. இதன் காரணமாகவே, நிர்வாக ரீதியாகவும் நிதி ரீதியாகவும் இந்த பழைய டெண்டர் முறை முழுமையாக ரத்து செய்யப்பட்டுள்ளது.

பழைய டெண்டரை ரத்து செய்துள்ள அரசு, அதற்குப் மாற்றாகப் பொதுமக்களின் மின்சாரப் பேருந்து தேவையைப் பூர்த்தி செய்யப் புதிய நடைமுறை ஒன்றைச் செயல்படுத்த முடிவு செய்துள்ளது. புதிய ஒப்பந்தத்தின்படி, மின்சாரப் பேருந்துகளை அரசே நேரடியாக வாங்காது. அதற்குப் பதிலாக, தகுதிவாய்ந்த தனியார் நிறுவனங்களே தங்களது சொந்த முதலீட்டில் மின்சாரப் பேருந்துகளை வாங்கி, அவற்றைப் பராமரித்து இயக்கும்.

இவ்வாறு பேருந்துகளை இயக்கும் தனியார் நிறுவனங்களுக்கு, அவை இயங்கும் கிலோமீட்டர் தூரத்தின் அடிப்படையில் ஒரு நிலையான தொகையை வழங்க அரசு திட்டமிட்டுள்ளது. இந்த புதிய 'மொத்தச் செலவு மாதிரி' மூலமாக, அரசுக்கு ஆரம்பக்கட்ட முதலீட்டுச் சுமை மற்றும் பராமரிப்புச் செலவுகள் முற்றிலுமாகத் தவிர்க்கப்படும். அதே நேரத்தில் பொதுமக்களுக்கு நவீன மின்சாரப் பேருந்து சேவைகளும் தங்கு தடையின்றிக் கிடைக்கும் எனப் போக்குவரத்துத் துறை அதிகாரிகள் தெரிவித்துள்ளனர். அரசின் இந்த மாற்றுத் திட்டம் குறித்த விரிவான வழிகாட்டுதல்கள் விரைவில் வெளியாகவுள்ளன.