புனே அருகே 400 அடி ஆழப் பள்ளத்தாக்கில் தள்ளி இளம் தொழிலதிபர் கேதன் விஷால் படுகொலை செய்யப்பட்ட வழக்கில், கைதான இளம்பெண் சியா கோயலின் பெற்றோர், "அவள் குற்றம் செய்திருப்பது நிரூபணமானால் அவளைத் தூக்கிலிட்டுத் தண்டியுங்கள்" என்று ஆவேசமாகப் பேட்டியளித்துள்ளது மகாராஷ்டிராவில் பெரும் பரபரப்பை ஏற்படுத்தியுள்ளது.

போலீசார் நடத்திய அதிரடிப் புலனாய்வில், புனே ககுஞ்சே பகுதியைச் சேர்ந்த ரியல் எஸ்டேட் அதிபரின் மகனும், இளம் தொழிலதிபருமான கேதன் விஷால் அகர்வால் (26) என்பவருக்கும், மசாலா மற்றும் முந்திரி வியாபாரம் செய்யும் குடும்பத்தைச் சேர்ந்த சியா கோயல் (20) என்ற பெண்ணுக்கும் கடந்த பிப்ரவரி மாதம் கோலாகலமாகத் திருமணம் நிச்சயதார்த்தம் நடைபெற்றது.

வருகிற நவம்பர் மாதம் இவர்களது திருமணத்தை நடத்த இருவீட்டாரும் முடிவு செய்திருந்தனர். நிச்சயதார்த்தம் முடிந்ததால், இந்த இளம் ஜோடியினர் பல இடங்களுக்கு ஒன்றாகச் சென்று வந்துள்ளனர். எனினும், சியா கோயலுக்குப் பாபுலால் சவுத்ரி (22) என்ற வாலிபருடன் ரகசியக் காதல் இருந்து வந்துள்ளது. கேதனுடனான திருமணத்தை நிறுத்த விரும்பிய சியா, தனது காதலனுடன் சேர்ந்து கேதனைக் கொலை செய்யக் கொடூரத் திட்டம் தீட்டியுள்ளார்.

கடந்த ஜூன் 18-ம் தேதி, சியா கோயல் தனது பிறந்தநாளைக் கொண்டாடுவதற்காக, வருங்கால கணவர் கேதன் விஷாலை புனே அருகில் உள்ள வரலாற்றுச் சிறப்புமிக்க லோஹாகாட் கோட்டைக்கு அழைத்துள்ளார். இருவரும் மலையின் செங்குத்தான பாறைப் பகுதியில் மலையேற்றம் செய்து புகைப்படம் எடுத்தபோது, கேதன் விஷால் எதிர்பாராதவிதமாகக் கால் தவறி 400 அடி ஆழமுள்ள பள்ளத்தாக்கில் விழுந்து விட்டதாகச் சியா கோயல் அங்கிருந்த பாதுகாவலர்களிடம் அழுதுக் கொண்டே கூறியுள்ளார். தீயணைப்பு மற்றும் மீட்புக்குழுவினர் சுமார் 3 மணிநேரம் போராடி கேதன் விஷாலை சடலமாக மீட்டனர். ஆரம்பத்தில் போலீசார் இதனை விபத்து மரணம் என வழக்குப் பதிவு செய்திருந்தனர்.

கேதன் விஷாலின் குடும்பத்தினருக்குச் சியாவின் நடத்தையில் சந்தேகம் ஏற்பட்டதால், அவர்கள் போலீசாரிடம் முறையிட்டனர். இதன் பேரில் சியா கோயலின் மொபைல் போன் அழைப்புகள் மற்றும் நடமாட்டங்களை போலீசார் தீவிரமாகக் கண்காணித்தனர். விசாரணையில், சியா கோயல் தனது காதலன் பாபுலால் சவுத்ரியை முன்கூட்டியே அந்த மலைப்பகுதிக்கு வரவழைத்து, ஆள் நடமாட்டம் இல்லாத நேரத்தில் கேதனைப் பின்புறமாகத் தள்ளித் தற்கொலை அல்லது விபத்து போலக் கொலை செய்த கோர முகம் வெளிச்சத்திற்கு வந்தது.

இந்தக் கொடூரக் கொலைச் சம்பவம் நாடு முழுவதும் பெரும் அதிர்வலைகளை ஏற்படுத்தியுள்ள நிலையில், கைதான சியா கோயல் மற்றும் அவரது காதலன் பாபுலால் சவுத்ரி ஆகிய இருவரையும் மாவல் நீதிமன்றத்தில் போலீசார் ஆஜர்படுத்தினர். இவர்களை வரும் ஜூன் 29-ஆம் தேதி வரை போலீஸ் காவலில் எடுத்து விசாரிக்க நீதிமன்றம் உத்தரவிட்டுள்ளது. இந்நிலையில், சியா கோயலின் பெற்றோர் தனியார் செய்தி நிறுவனத்திற்கு அளித்த உருக்கமான பேட்டியில் தங்களது குமுறலை வெளிப்படுத்தியுள்ளனர்:

"எங்கள் வளர்ப்பில் இப்படி ஒரு துரோகி உருவாவாள் என்று நாங்கள் நினைக்கவில்லை. அவள் செய்தது மன்னிக்க முடியாத குற்றம். சியா குற்றம் செய்திருப்பது நீதிமன்றத்தில் நிரூபணமானால் அவளுக்குச் சட்டப்படி கடுமையான தண்டனை கிடைக்க வேண்டும். அவள் குற்றவாளி என்றால் அவளைத் தூக்கிலிட்டுக் கொல்லுங்கள்; நாங்கள் தடுக்க மாட்டோம். எங்கள் மகளாக இருந்தாலும் சரி, ஒரு உயிரைப் பறித்த குற்றவாளிக்குத் தண்டனை கிடைத்தே தீர வேண்டும்" என்று கண்ணீருடனும் ஆவேசத்துடனும் தெரிவித்துள்ளனர்.