கடந்த 2021 சட்டமன்றத் தேர்தலில் உடல் முழுவதும் கிலோ கணக்கில் தங்க நகைகளை அணிந்து ஹெலிகாப்டரில் வந்து பிரசாரம் செய்து, தமிழகத்தையே திரும்பிப் பார்க்க வைத்தவர் ஹரி நாடார். இந்த முறை சிறையிலிருந்து அவர் களம் காண எடுத்த முயற்சி தோல்வியில் முடிந்துள்ளது.

பனங்காட்டுப்படை கட்சியிலிருந்து விலகி, ‘சத்திரிய சான்றோர் படை’ என்ற புதிய கட்சியைத் தொடங்கிய ஹரி நாடார், தற்போது வங்கிக் கடன் மோசடி வழக்கில் கைது செய்யப்பட்டு சென்னை புழல் சிறையில் அடைக்கப்பட்டுள்ளார்.

சிறையிலிருந்தே ஆலங்குளம் தொகுதியில் சுயேச்சையாகப் போட்டியிட விரும்பிய அவர், தனது முகவர் அலெக்ஸ் நாடார் மூலம் வேட்புமனுவைத் தாக்கல் செய்தார். இன்று நடைபெற்ற வேட்புமனு பரிசீலனையின் போது, ஹரி நாடார் சிறையிலிருந்து முகவர் மூலம் மனு தாக்கல் செய்தது விதிமுறைகளின்படி செல்லாது எனத் தேர்தல் நடத்தும் அலுவலர் அறிவித்து, அவரது மனுவை நிராகரித்தார்.

2021 தேர்தலில் ஆலங்குளம் தொகுதியில் போட்டியிட்ட ஹரி நாடார், சுமார் 37,726 வாக்குகளைப் பெற்று அனைவரையும் ஆச்சரியத்தில் ஆழ்த்தினார். பல முக்கியக் கட்சிகளின் வெற்றி வாய்ப்பைத் தீர்மானிக்கும் காரணியாக அவர் அப்போது இருந்தார். இந்த முறையும் அவர் போட்டியிட்டால் வாக்குகள் பிரியும் என எதிர்பார்க்கப்பட்ட நிலையில், தற்போது அவரது மனு நிராகரிக்கப்பட்டுள்ளது அந்தத் தொகுதியின் தேர்தல் முடிவுகளில் பெரிய மாற்றத்தை ஏற்படுத்தக்கூடும்.

ஹரி நாடார் சிறையிலிருந்தே வெற்றி பெறுவார் என நம்பிக்கையுடன் பணியாற்றி வந்த அவரது கட்சி நிர்வாகிகள் மற்றும் தொண்டர்கள், இந்த அறிவிப்பால் வட்டாட்சியர் அலுவலகம் முன் கூடித் தங்களது அதிருப்தியைத் தெரிவித்தனர்.