வடதமிழகத்தில் அடுத்த இரண்டு வாரங்களுக்கு வெயிலின் தாக்கம் வழக்கத்தை விட மிக அதிகமாக இருக்கும் என்றும், வெப்பநிலை 41 டிகிரி செல்சியஸ் வரை பதிவாக வாய்ப்புள்ளதாகவும் சென்னை வானிலை ஆய்வு மையம் அதிரடி எச்சரிக்கை விடுத்துள்ளது.

இது குறித்து வானிலை ஆய்வு மையம் வெளியிட்டுள்ள அறிவிப்பில், தமிழகத்தின் வட மாவட்டங்களில் அடுத்த 2 வாரங்களுக்கு வெயிலின் தாக்கம் வழக்கமான அளவை விடக் கூடுதலாக இருக்கக்கூடும். சென்னை, காஞ்சிபுரம், திருவள்ளூர், செங்கல்பட்டு, வேலூர், ராணிப்பேட்டை உள்ளிட்ட வடதமிழக மாவட்டங்களில் அதிகபட்ச வெப்பநிலையானது 39 டிகிரி முதல் 41 டிகிரி செல்சியஸ் வரை பதிவாக வாய்ப்புள்ளது. வளிமண்டல மாறுபாடுகள் காரணமாக இந்த வெப்ப அலையின் தாக்கம் அதிகமாக இருக்கும் எனக் கணிக்கப்பட்டுள்ளது.

வெயிலின் கொடுமை அதிகமாக இருக்கும் என்பதால் பொதுமக்கள் தங்களைப் பாதுகாத்துக் கொள்ளப் பின்வரும் வழிமுறைகளைப் பின்பற்றுமாறு வானிலை ஆய்வு மையம் கேட்டுக் கொண்டுள்ளது. காலை 11:00 மணி முதல் மதியம் 3:00 மணி வரை பொதுமக்கள் அவசியமின்றி நேரடியாக வெயிலில் செல்வதையும், வெளியில் வருவதையும் தவிர்க்க வேண்டும். குறிப்பாக, முதியவர்கள், குழந்தைகள் மற்றும் உடல்நலக் குறைபாடு உள்ளவர்கள் (இதய நோய், சர்க்கரை நோய் உள்ளவர்கள்) இந்த வெப்ப அலையின் போது மிகுந்த எச்சரிக்கையுடன் இருக்க வேண்டும்.

உடல் நலம்: தாகம் எடுக்காவிட்டாலும் போதிய அளவு குடிநீர், இளநீர், மோர் மற்றும் பழச்சாறுகளைப் பருகி உடலை எப்போதும் நீரேற்றத்துடன் வைத்துக் கொள்ள வேண்டும்.

கோடைக் காலம் தீவிரமடைந்து வரும் நிலையில், அடுத்த 2 வாரங்களுக்கான இந்த வெயில் எச்சரிக்கை பொதுமக்களிடையே பெரும் கவலையை ஏற்படுத்தியுள்ளது.