நாடு முழுவதும் இன்று தீபாவளிப் பண்டிகை உற்சாகமாகக் கொண்டாட்டம் கண்டு வரும் வேளையில், சென்னை மற்றும் அதன் புறநகர்ப் பகுதிகளில் அதிகாலையில் திடீரெனக் கனமழை வெளுத்து வாங்கியது.

தென்கிழக்கு அரபிக்கடல் மற்றும் அதனை ஒட்டிய கேரள கடலோரப் பகுதிகளின் மேல் சுமார் 0.9 கி.மீ. உயரத்தில் நிலவும் வளிமண்டலச் சுழற்சி காரணமாகத் தமிழகத்தில் இடி, மின்னலுடன் கூடிய மழை பெய்யும் எனச் சென்னை வானிலை ஆய்வு மையம் ஏற்கனவே அறிவித்திருந்தது.

இதன்படி, இன்று அதிகாலை 3 மணியளவில் சென்னையின் பல்வேறு இடங்களில் திடீரெனப் பரவலாக மழை பெய்யத் தொடங்கியது. வேப்பேரி, கிண்டி, ஈக்காட்டுத்தாங்கல், எழும்பூர், பூந்தமல்லி, பெரியமேடு, சென்னை சென்ட்ரல் உள்ளிட்ட முக்கியப் பகுதிகளில் அரை மணி நேரத்திற்கும் மேலாகச் சரமாரியாக மழை கொட்டித் தீர்த்தது. பலத்த மழையைத் தொடர்ந்து விட்டுவிட்டு காலை 5.30 மணி வரை நகரின் பல இடங்களில் மழை நீடித்தது.

சென்னை, திருவள்ளூர், காஞ்சிபுரம், செங்கல்பட்டு உள்ளிட்ட 15 மாவட்டங்களில் தீபாவளி நாளில் மிதமான மழை பெய்யக்கூடும் என வானிலை மையம் முன்னறிவிப்பு செய்திருந்த நிலையில், இந்த அதிகாலை மழை நகரின் வெப்பத்தைக் குறைத்துக் குளிர்ச்சியான சூழலை ஏற்படுத்தியுள்ளது.

அதிகாலை மழையால் காலை நேரப் பட்டாசுக் கொண்டாட்டங்களில் சிறிதளவு தாமதம் ஏற்பட்ட போதிலும், மழை குறைந்ததும் பொதுமக்கள் உற்சாகத்துடன் பட்டாசுகளை வெடித்துத் தீபாவளியைக் கொண்டாடத் தொடங்கியுள்ளனர்.