தமிழகத்தில் கொட்டப்போகும் கனமழை.. எந்தெந்த மாவட்டங்களுக்கு அலர்ட்? - அடுத்த 5 நாட்களுக்கான வானிலை எச்சரிக்கை!

தென்மேற்கு வங்கக்கடல் பகுதிகள் முதல் லட்சத்தீவு பகுதிகள் வரை மற்றும் வட தமிழகக் கடலோரப் பகுதிகளில் நிலவும் வளிமண்டலக் காற்றழுத்தத் தாழ்வுப் பாதைகள் காரணமாக, தமிழகத்தின் பல மாவட்டங்களில் பலத்த காற்றுடன் கூடிய கனமழை மற்றும் மிதமான மழைக்கு வாய்ப்புள்ளதாகச் சென்னை வானிலை ஆய்வு மையம் தெரிவித்துள்ளது.

இன்று ஆகஸ்ட் 7ம் தேதி மேற்குத் தொடர்ச்சி மலையை ஒட்டியுள்ள மாவட்டங்களில் பலத்த காற்றுடன் கனமழை பெய்யக்கூடும்: கோயம்புத்தூர், தேனி மாவட்டங்களின் மலைப்பகுதிகளில் ஓரிரு இடங்களில் இடி, மின்னல் மற்றும் மணிக்கு 40 முதல் 50 கி.மீ வேகத்தில் பலத்த காற்றுடன் கூடிய கனமழை பெய்ய வாய்ப்புள்ளது. நீலகிரி மாவட்டத்திலும் ஓரிரு இடங்களில் இடி மின்னலுடன் கூடிய கனமழை பதிவாகக்கூடும்.

வட தமிழகம் மற்றும் மேற்குத் தொடர்ச்சி மலையை ஒட்டியுள்ள பல்வேறு மாவட்டங்களிலும், சென்னை, திருவள்ளூர், காஞ்சிபுரம், செங்கல்பட்டு, ராணிப்பேட்டை, வேலூர், திருப்பத்தூர், திருவண்ணாமலை, சேலம், நாமக்கல் ஆகிய மாவட்டங்களிலும்  இடி மின்னலுடன் கூடிய மிதமான மழைக்கு வாய்ப்புள்ளது: ஏனைய தமிழகப் பகுதிகள், புதுச்சேரி மற்றும் காரைக்காலில் ஓரிரு இடங்களில் பலத்த காற்றுடன் லேசானது முதல் மிதமான மழை பெய்யக்கூடும்.

ஆகஸ்ட் 8ம் தேதி மேற்கு தொடர்ச்சி மலை மாவட்டங்களில் ஓரிரு இடங்களில் மிதமான மழையும், ஏனைய தமிழகம், புதுவை மற்றும் காரைக்கால் பகுதிகளில் லேசான மழையும் பெய்யக்கூடும். ஆகஸ்ட் 9 முதல் ஆகஸ்ட் 12ம் தேதி வரை மாநிலத்தின் ஓரிரு இடங்களில் லேசானது முதல் மிதமான மழை தொடர வாய்ப்புள்ளது.

சென்னையில் வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் மாலை அல்லது இரவு வேளைகளில் இடி மின்னலுடன் கூடிய மிதமான மழை பெய்யக்கூடும். அதிகபட்ச வெப்பநிலை 35-36° செல்சியஸாகவும், குறைந்தபட்ச வெப்பநிலை 25-26° செல்சியஸாகவும் இருக்கக்கூடும்.