தமிழகத்தில் கத்திரி வெயில் வறுத்தெடுத்து வரும் நிலையில், வெப்ப அலையில் இருந்து தப்பிக்க பொதுமக்களுக்குக் குளிர்ச்சியான செய்தி ஒன்றைச் சென்னை வானிலை ஆய்வு மையம் வெளியிட்டுள்ளது. மத்திய வங்கக்கடல் பகுதிகளில் இருந்து தமிழகம் வரை, தென்மேற்கு வங்கக்கடல் வழியாக ஒரு வளிமண்டல காற்றழுத்த தாழ்வு பாதை நிலவுகிறது.

இதன் காரணமாக, இன்று தமிழகத்தின் சேலம், தர்மபுரி, கிருஷ்ணகிரி ஆகிய 3 மாவட்டங்களில் ஓரிரு இடங்களில் இடி, மின்னல் மற்றும் பலத்த காற்றுடன் (மணிக்கு 30 முதல் 40 கி.மீ வேகம்) கூடிய கனமழை பெய்யக்கூடும் எனத் தெரிவிக்கப்பட்டுள்ளது.

மேலும், இதன் தாக்கத்தால் தமிழகத்தின் இதர ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்வதற்கும் வாய்ப்புகள் உள்ளதாக வானிலை ஆய்வு மையம் குறிப்பிட்டுள்ளது. கடந்த சில நாட்களாகக் கடுமையான வெயிலால் அவதிப்பட்டு வந்த இந்த மாவட்டங்களின் மக்களுக்கு, இந்த மழை அறிவிப்பு சற்றே ஆறுதலையும் மகிழ்ச்சியையும் தந்துள்ளது.