கள்ளக்குறிச்சி மாவட்டம் உளுந்தூர்பேட்டை அருகே கட்டுப்பாட்டை இழந்த கார் ஒன்று விளம்பர பேனரின் அடித்தளச் சுவரில் பயங்கரமாக மோதிய விபத்தில், ஒரே குடும்பத்தைச் சேர்ந்த தாய் மற்றும் அவரது இரண்டு மகன்கள் சம்பவ இடத்திலேயே பரிதாபமாக உயிரிழந்தனர். மேலும் 3 பெண்கள் படுகாயங்களுடன் மருத்துவமனையில் அனுமதிக்கப்பட்டுள்ளனர்.

கள்ளக்குறிச்சி மாவட்டம் உளுந்தூர்பேட்டை அருகே உள்ள செங்குறிச்சி கிராமப் பகுதியில் கார் ஒன்று இன்று அதிகாலை சென்று கொண்டிருந்தது. அப்போது எதிர்பாராத விதமாக ஓட்டுநரின் கட்டுப்பாட்டை இழந்த கார், சாலையோரம் இருந்த ஒரு பிரம்மாண்ட விளம்பர பேனரின் அடித்தளக் கான்கிரீட் சுவரில் அதிவேகமாக மோதியது. இந்த மோதலின் வீரியம் காரணமாகக் காரின் முன்பக்கப் பகுதி முற்றிலும் நசுங்கி நொறுங்கியது. காரின் உள்ளே பயணித்தவர்கள் இடிபாடுகளுக்குள் சிக்கிக் கொண்டனர்.

ஒரே குடும்பத்தில் நேர்ந்த சோகம்: இக்கோர விபத்தில் காரில் பயணித்த ஒரே குடும்பத்தைச் சேர்ந்த தாய் மற்றும் அவரது இரண்டு மகன்கள் ஆகிய மூன்று பேரும் பலத்த காயமடைந்து சம்பவ இடத்திலேயே பரிதாபமாக உயிரிழந்தனர். இவர்களுடன் காரில் பயணித்த மேலும் 3 பெண்கள் கடுமையான காயங்களுடன் உயிருக்குப் போராடிக் கொண்டிருந்தனர். விபத்தைக் கண்டு அதிர்ச்சியடைந்த அக்கம் பக்கத்தினர் மற்றும் வாகன ஓட்டிகள் உடனடியாக காவல்துறையினருக்கும், ஆம்புலன்ஸுக்கும் தகவல் தெரிவித்தனர்.

சம்பவ இடத்திற்கு விரைந்து வந்த உளுந்தூர்பேட்டை போலீசார், இடிபாடுகளில் சிக்கியிருந்த 3 பெண்களை மீட்டு சிகிச்சைக்காக அருகில் உள்ள அரசு பொது மருத்துவமனைக்கு அனுப்பி வைத்தனர். அங்கு அவர்களுக்குத் தீவிர சிகிச்சை அளிக்கப்பட்டு வருகிறது. தொடர்ந்து, உயிரிழந்த தாய் மற்றும் 2 மகன்களின் உடல்களைக் கைப்பற்றிய போலீசார், பிரேதப் பரிசோதனைக்காக மருத்துவமனைக்கு அனுப்பி வைத்தனர். இந்த விபத்து குறித்து உளுந்தூர்பேட்டை காவல்துறையினர் வழக்குப் பதிவு செய்து, விபத்துக்கான முதன்மைக் காரணம் என்ன? உறக்கக் கலக்கத்தால் இந்த விபத்து நேரிட்டதா? என்பது குறித்துத் தீவிர விசாரணை நடத்தி வருகின்றனர். ஒரே குடும்பத்தில் 3 பேர் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.