கன்னியாகுமரி மாவட்டத்தில் தீராத தலைவலி காரணமாக 24 வயது இளம்பெண் ஒருவர் எலக்ட்ரிக் எந்திரத்தால் தனது கழுத்தை அறுத்துத் தற்கொலை செய்து கொண்ட அதிர்ச்சிச் சம்பவம் அப்பகுதியில் பெரும் சோகத்தை ஏற்படுத்தியுள்ளது.

கன்னியாகுமரி மாவட்டம் சிவாநகர் பகுதியைச் சேர்ந்தவர் பால்பாண்டி. இவருடைய மகள் காவியா (24). எம்.எஸ்.சி பட்டதாரியான இவருக்கு இன்னும் திருமணமாகவில்லை. கடந்த சில நாட்களாகவே கடுமையான மன வருத்தத்தில் இருந்த காவியா, நேற்று வீட்டில் யாரும் எதிர்பாராத நேரத்தில் ஒரு கொடூரமான முடிவை எடுத்துள்ளார்.

வீட்டில் வைக்கப்பட்டிருந்த டைல்ஸ் கற்களை அறுக்கப் பயன்படும் எலக்ட்ரிக் எந்திரத்தை இயக்கிய காவியா, திடீரென அதனைத் தனது கழுத்தில் வைத்துள்ளார். எந்திரம் அதிவேகமாக ஓடியதால் கண்ணிமைக்கும் நேரத்தில் அவரது கழுத்து ஆழமாக அறுபட்டது. இதனால் வலியால் தாங்க முடியாமல் காவியா அலறித் துடித்துள்ளார்.

அவரது அலறல் சத்தத்தைக் கேட்டு அதிர்ச்சியடைந்த அக்கம் பக்கத்தினர் மற்றும் உறவினர்கள் உடனடியாக ஓடி வந்து, இரத்த வெள்ளத்தில் கிடந்த காவியாவை மீட்டனர். பின்னர் அவரை சிகிச்சைக்காக அருகில் உள்ள அரசு மருத்துவமனைக்குக் கொண்டு சென்றனர். ஆனால், அங்கு அவரைப் பரிசோதித்த மருத்துவர்கள், காவியா ஏற்கனவே இறந்துவிட்டதாகத் தெரிவித்தனர்.

இச்சம்பவம் குறித்துத் தகவல் அறிந்து வந்த சுசீந்திரம் காவல்துறையினர், காவியாவின் உடலைக் கைப்பற்றி முதற்கட்ட விசாரணையைத் தொடங்கினர். அதில், காவியாவுக்கு நீண்ட நாட்களாகத் 'தீராத தலைவலி' பிரச்சினை இருந்து வந்ததாகவும், பல மருத்துவமனைகளில் காட்டியும் குணமாகாததால் ஏற்பட்ட கடுமையான மன உளைச்சல் காரணமாகவே அவர் இந்த விபரீத தற்கொலை முடிவைத் தேடிக்கொண்டார் என்பதும் தெரியவந்துள்ளது.

இருப்பினும், இந்தத் தற்கொலைக்கு வேறு ஏதேனும் குடும்பப் பிரச்சினைகள் அல்லது மறைமுகக் காரணங்கள் இருக்கலாமா என்ற கோணத்திலும் சுசீந்திரம் போலீசார் வழக்குப் பதிவு செய்து தீவிர விசாரணை நடத்தி வருகின்றனர். படித்து முடித்த இளம் பட்டதாரி பெண் ஒருவர் இத்தகைய கொடூரமான முறையில் உயிரை மாய்த்துக் கொண்ட சம்பவம் அந்த கிராமத்தையே நிலைகுலையச் செய்துள்ளது.