திருச்சி அருகே பயங்கரம்... தோட்ட வேலையை முடித்துத் திரும்பிய விவசாயி தலை துண்டித்துப் படுகொலை!
திருச்சியை அடுத்த சோமரசம்பேட்டை அருகே விவசாயத் தொழிலாளி ஒருவர் மர்ம நபர்களால் தலை துண்டித்துக் கொடூரமாகப் படுகொலை செய்யப்பட்ட சம்பவம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது.
திருச்சி சோமரசம்பேட்டை அருகே உள்ள போதாவூர் மேலத்தெருவைச் சேர்ந்தவர் பாண்டியன் (49). விவசாயத் தொழிலாளியான இவருக்கு மனைவி, இரண்டு மகள்கள் மற்றும் ஒரு மகன் உள்ளனர். இதில் மூத்த மகளுக்குத் திருமணமாகிப் பக்கத்துத் தெருவிலேயே வசித்து வருகிறார்.
பாண்டியன் நேற்று இரவு தனது தோட்டத்து வேலைகளை முடித்துவிட்டு வழக்கம்போல் வீட்டிற்கு நடந்து வந்து கொண்டிருந்தார். அப்போது அவரை நோட்டமிட்டுப் பின்தொடர்ந்து வந்த மர்ம கும்பல் ஒன்று, பயங்கர ஆயுதங்களால் பாண்டியனைச் சுற்றிவளைத்துச் சரமாரியாக வெட்டியது. இந்தக் கொடூரத் தாக்குதலில் பாண்டியனின் தலை துண்டாகி, அவர் சம்பவ இடத்திலேயே ரத்த வெள்ளத்தில் துடிதுடித்துப் பரிதாபமாக உயிரிழந்தார். இதனைத் தொடர்ந்து அந்த மர்ம நபர்கள் இருளில் தப்பியோடிவிட்டனர்.
இந்தப் படுகொலை குறித்துத் தகவல் அறிந்தவுடன் சோமரசம்பேட்டை காவல் நிலைய ஆய்வாளர் செந்தில்குமார் நிகழ்விடத்திற்கு விரைந்து சென்று ஆய்வு மேற்கொண்டார். மேலும், திருச்சி மாவட்டக் காவல் கண்காணிப்பாளர் டோங்கரே பிரவீன் உமேஷும் சம்பவ இடத்திற்கு நேரில் வந்து பார்வையிட்டு விசாரணையைத் துரிதப்படுத்தினார். உயிரிழந்த பாண்டியனின் உடலைக் கைப்பற்றிய போலீசார், பிரேதப் பரிசோதனைக்காகத் திருச்சி அரசு மருத்துவமனைக்கு அனுப்பி வைத்தனர்.
முன்விரோதம் காரணமாக இந்தக் கொலை நடந்ததா அல்லது வேறு ஏதேனும் பின்னணி உள்ளதா என்பது குறித்துப் போலீசார் வழக்குப்பதிவு செய்து விசாரணை நடத்தி வருகின்றனர். இச்சம்பவம் தொடர்பாகச் சந்தேகத்தின் அடிப்படையில் ஒரு வாலிபரைப் பிடித்துப் போலீசார் தீவிர விசாரணை மேற்கொண்டு வருகின்றனர்.