கட்டுமான அனுமதிக்கான கட்சி நிதி வசூலுக்கு முற்றுப்புள்ளி... வீடுகளின் விலை குறைய வாய்ப்பு!

சென்னை பெருநகர் வளர்ச்சி குழுமம் மற்றும் நகர் ஊரமைப்பு துறை சார்பில் வழங்கப்படும் கட்டுமான அனுமதிகளுக்குக் கட்சி நிதி வசூலிக்கும் முறை நிறுத்தப்பட்டுள்ளது. முன்பு அடுக்குமாடி கட்டிடத் திட்டங்களுக்கு அனுமதி அளிக்கும் போது சதுர அடிக்கு 27 ரூபாய் முதல் 35 ரூபாய் வரை கட்சி நிதி வசூலிக்கப்பட்டதாகக் புகார்கள் எழுந்தன. அரசியல் பிரமுகர்களின் தலையீட்டால் இந்த நிதி வழங்காத நிறுவனங்களுக்குக் கட்டிட அனுமதிகள் வழங்கப்படாமல் நிறுத்தி வைக்கப்பட்டு வந்தன. கட்டுமான நிறுவனங்களும் இந்த கூடுதல் செலவை வீடுகளின் விலையிலேயே சேர்த்து மக்களிடம் வசூலித்து வந்ததால் சொத்துக்களின் விலை கடுமையாக உயர்ந்தது.

இந்நிலையில் கட்டிட அனுமதி பெறுவதற்காகக் கட்சி நிதி வசூலிக்கக் கூடாது என்று தமிழ்நாடு அரசு அதிரடியாக உத்தரவிட்டுள்ளது. அரசின் இந்த வரவேற்கத்தக்க முடிவை இந்திய ரியல் எஸ்டேட் மேம்பாட்டாளர் சங்கங்களின் கூட்டமைப்பு மற்றும் கட்டுமான வல்லுனர் சங்கங்கள் பாராட்டியுள்ளன. கட்சி நிதி வசூல் முற்றிலும் நிறுத்தப்பட்டதால் கட்டுமான நிறுவனங்களுக்கு வீண் செலவுகள் பெருமளவில் மிச்சமாகியுள்ளன. இந்தத் தொகை மிச்சமானதன் மூலம் ரியல் எஸ்டேட் தொழிலில் நிலவி வந்த தேவையற்ற நடைமுறைச் சிரமங்கள் முடிவுக்கு வந்துள்ளன.

கட்டுமானச் செலவு குறைந்துள்ளதால் இதன் நேரடிப் பயனை மக்களுக்கு வழங்க வேண்டும் என்பதில் கட்டுமான துறையினர் உறுதியாக உள்ளனர். புதிதாக அறிவிக்கப்பட உள்ள குடியிருப்பு திட்டங்களில் வீடுகளின் விலை சதுரடிக்கு 100 ரூபாய் வரை குறைய அதிக வாய்ப்புகள் உருவாகியுள்ளன. விலை குறைப்பால் சொந்த வீடு வாங்கத் திட்டமிட்டுள்ள நடுத்தர மக்களுக்குப் பெரும் நிம்மதியும் மகிழ்ச்சியும் ஏற்பட்டுள்ளது. அரசின் இந்த அதிரடி நடவடிக்கையால் ரியல் எஸ்டேட் துறை மீண்டும் புத்துயிர் பெற்று விற்பனை சூடுபிடிக்கும் என எதிர்பார்க்கப்படுகிறது.