அமெரிக்காவுக்கும் ஈரானுக்கும் இடையிலான மோதல் இப்போது போர் மேகங்களைச் சூழ்ந்துள்ள நிலையில், அதிபர் டொனால்ட் டிரம்ப் ஈரானை நோக்கி தனது மிகக் கடுமையான எச்சரிக்கையை விடுத்துள்ளார்.

ஹோர்முஸ் ஜலசந்தியில் பிரான்ஸ் மற்றும் இங்கிலாந்து கப்பல்கள் மீது ஈரான் நடத்திய தாக்குதல், ஏற்கனவே உள்ள போர்நிறுத்த ஒப்பந்தத்தை முழுமையாக மீறும் செயல் என்று டிரம்ப் சாடியுள்ளார். "இது சற்றும் நாகரிகமான செயல் அல்ல" என்று கிண்டலாகக் குறிப்பிட்ட அவர், ஈரானின் 'கொலை இயந்திரத்திற்கு' முற்றுப்புள்ளி வைக்க வேண்டிய நேரம் வந்துவிட்டதாகத் தெரிவித்துள்ளார்.

ஹோர்முஸ் ஜலசந்தியை மூடுவதால் ஈரானுக்குத் தான் ஒரு நாளைக்கு 50 கோடி டாலர் (சுமார் ₹4,200 கோடி) இழப்பு ஏற்படும். இது அமெரிக்காவை விட ஈரானையே அதிகம் பாதிக்கும்.

ஈரான் செய்யும் செயலால் கப்பல்கள் இப்போது அமெரிக்காவின் டெக்சாஸ் மற்றும் அலாஸ்கா நோக்கிச் செல்வதாகவும், இதனால் அமெரிக்காவுக்குப் பொருளாதார ரீதியாகச் சாதகமே என்றும் அவர் கூறியுள்ளார். "நாங்கள் ஒரு நியாயமான ஒப்பந்தத்தை முன்வைக்கிறோம். அதை ஈரான் ஏற்காவிட்டால், அந்நாட்டின் ஒவ்வொரு மின் நிலையத்தையும், ஒவ்வொரு பாலத்தையும் அமெரிக்கா தகர்த்து அழிக்கும்," என மிரட்டல் விடுத்துள்ளார்.

கடந்த 47 ஆண்டுகளாக அமெரிக்க அதிபர்கள் செய்யத் துணியாத காரியத்தை (ஈரானை வீழ்த்துவது) தான் செய்யப்போவதாகவும், அதைச் செய்வது தனக்குப் பெருமையளிக்கும் என்றும் டிரம்ப் கூறியுள்ளார். பேச்சுவார்த்தைக்காகத் தனது பிரதிநிதிகள் நாளை பாகிஸ்தான் தலைநகர் இஸ்லாமாபாத் செல்வதாகவும் அவர் உறுதிப்படுத்தியுள்ளார்.

டிரம்பின் இந்த நேரடி மிரட்டல் ஈரானைப் பணிய வைக்குமா? அல்லது இது ஒரு மிகப்பெரிய உலகப்போருக்கு வழிவகுக்குமா? ஏற்கனவே இந்தியக் கப்பல்களும் ஈரானால் தாக்கப்பட்ட நிலையில், அமெரிக்காவின் இந்த அதிரடி நடவடிக்கை சர்வதேச அரசியலில் பெரும் மாற்றத்தை ஏற்படுத்தும் என எதிர்பார்க்கப்படுகிறது.