15 ஆண்டு கால திரிணாமுல் காங்கிரஸ் ஆட்சியை வீழ்த்தி, மேற்குவங்கத்தில் முதன்முறையாகப் பாரதிய ஜனதா கட்சி (பாஜக) அரியணையை எட்டிப்பிடித்துள்ளது. இருப்பினும், முதல்வர் மம்தா பானர்ஜி தனது பதவியை ராஜினாமா செய்ய மறுத்து வருவது கொல்கத்தா அரசியலில் பெரும் பரபரப்பை ஏற்படுத்தியுள்ளது.

நேற்று (மே 4) வெளியான இறுதி முடிவுகளின்படி, மொத்தமுள்ள 294 தொகுதிகளில் (தேர்தல் நடந்த 293 இடங்களில்) பாஜக  207 இடங்களைக் கைப்பற்றி மூன்றில் இரண்டு பங்கு பெரும்பான்மையுடன் வரலாற்று வெற்றியைப் பதிவு செய்துள்ளது. திரிணாமுல் காங்கிரஸ் (TMC) வெறும் 80 இடங்களுக்குத் தள்ளப்பட்டு படுதோல்வியைச் சந்தித்துள்ளது. காங்கிரஸ் மற்றும் இடதுசாரிகள் தலா 2 மற்றும் 1 இடங்களில் மட்டுமே வெற்றி பெற்றுள்ளனர்.

தனது கோட்டையான பவானிபூர் தொகுதியிலேயே பாஜக-வின் சுவேந்து அதிகாரியிடம் சுமார் 15,000 வாக்குகள் வித்தியாசத்தில் மம்தா பானர்ஜி தோல்வியடைந்தார். இந்நிலையில் இன்று செய்தியாளர்களிடம் பேசிய அவர் "நான் முதல்வர் பதவியை ராஜினாமா செய்யும் பேச்சுக்கே இடமில்லை. இந்தத் தேர்தல் முடிவுகள் மக்களின் உண்மையான தீர்ப்பு அல்ல; இது ஒரு திட்டமிடப்பட்ட சதி. நான் தோல்வியடையவில்லை, தேர்தல் ஆணையமும் பாஜக-வும் இணைந்து எங்களைத் தோற்கடித்துள்ளன. உண்மையான மக்கள் ஆதரவு எங்களுக்கே உள்ளது" என்று ஆக்ரோஷமாகத் தெரிவித்துள்ளார். மேலும், "நான் லோக் பவனுக்கு (ஆளுநர் மாளிகை) செல்லமாட்டேன்" என்றும் அவர் திட்டவட்டமாகக் கூறியுள்ளார்.

ஒரு கட்சியின் ஆட்சி கவிழ்ந்து, மற்றொரு கட்சி பெரும்பான்மை பெற்றுள்ள நிலையில், தார்மீக அடிப்படையில் முதல்வர் தனது பதவியை ராஜினாமா செய்ய வேண்டும் என்பதே மரபு. ஆனால், மம்தா பானர்ஜி அதற்கு மறுப்பு தெரிவித்து வருவது அம்மாநிலத்தில் அரசியல் சாசனச் சிக்கலை ஏற்படுத்தலாம் எனக் கருதப்படுகிறது.

அதே சமயம், வரும் மே 9-ஆம் தேதி பாஜக மேற்குவங்கத்தில் தனது புதிய அரசை அமைப்பதற்கான பணிகளில் தீவிரமாக ஈடுபட்டுள்ளது. இதற்காக அமித் ஷா மற்றும் ஜே.பி. நட்டா ஆகியோர் மேலிடப் பார்வையாளர்களாக நியமிக்கப்பட்டுள்ளனர்.