முதலமைச்சர் விஜய்யின் கரூர் மாவட்டப் பொதுக்கூட்டப் பேச்சுக்கு, அதிமுக முன்னாள் அமைச்சர் ஆர்.பி. உதயகுமார் முறையில் தனது கண்டனங்களை பதிவு செய்துள்ளார்.

மதுரையில் செய்தியாளர்களைச் சந்தித்த முன்னாள் அமைச்சர் ஆர்.பி. உதயகுமார், முதலமைச்சர் விஜய் அதிமுக மற்றும் திமுக ஆகிய இரு கட்சிகளையும் விமர்சித்ததற்குப் பதிலடி கொடுத்தார். 

"தமிழக முதலமைச்சராகப் பொறுப்பேற்றுள்ள விஜய்யின் அண்மைக்காலப் பேச்சுக்கள் அனைத்தும் ஆணவத்தின் உச்சமாக உள்ளன. ஒரு மாநிலத்தின் முதல்வர் என்ற பொறுப்பை உணராமல், சினிமா நாயகன் போல் பஞ்ச் டயலாக் பேசுகிறேன் என்ற எண்ணத்தில் அவர் வாயைத் திறந்தாலே சாக்கடை போன்ற வார்த்தைகள் தான் வெளிவருகின்றன" என்று ஆர்.பி. உதயகுமார் சாடியுள்ளார்.

கரூரில் நடந்த தவெக பொதுக்கூட்டத்தில், அதிமுகவும் திமுகவும் கூட்டுக் களவாணிகள் என முதலமைச்சர் விஜய் விமர்சித்திருந்தார். இதற்குப் பதிலடி கொடுத்த அவர், "நா கூசாமல் கோடிக்கணக்கான தொண்டர்களின் மனம் புண்படும் வகையில், மக்கள் செல்வாக்குள்ள பேரியக்கங்களை நோக்கிக் கூட்டுக் களவாணிகள் என ஒரு களவாணி சொன்னால் அதனை எப்படி ஏற்றுக்கொள்ள முடியும்?" என அடுக்கடுக்கான கேள்விகளை எழுப்பினார்.

2026 சட்டமன்றத் தேர்தல் முடிவுகளுக்குப் பிறகு, தமிழகத்தில் நிலவி வரும் புதிய அரசியல் சூழலில் ஆளுங்கட்சியான தவெகவிற்கும், முக்கிய எதிர்க்கட்சியான அதிமுகவிற்கும் இடையே கருத்து மோதல்கள்  உச்சக்கட்டத்தை எட்டியுள்ளன.

உதயகுமாரின் எச்சரிக்கை: மக்கள் நலத் திட்டங்களைச் செயல்படுத்துவதில் கவனம் செலுத்தாமல், எதிர்க்கட்சிகளைத் தரம் தாழ்ந்து விமர்சிப்பதையே தவெக அரசு தனது வாடிக்கையாகக் கொண்டுள்ளது என்றும், மக்கள் விரைவில் இதற்குப் தகுந்த பாடம் புகட்டுவார்கள் என்றும் ஆர்.பி. உதயகுமார் தனது செய்தியாளர் சந்திப்பில் எச்சரித்துள்ளார்.