கள்ளத்தொடர்பால் விபரீதம்... பைக் மீது காரை மோதி நடுரோட்டில் ஓட ஓட வெட்டிக்கொலை; 5 பேர் கைது!

திருவள்ளூர் அருகே கள்ளத்தொடர்பு விவகாரத்தில் பழிவாங்கும் நோக்கில், பெயிண்டர் மீது காரை மோதிப் பொதுமக்கள் முன்னிலையில் கொடூரமாக வெட்டிக்கொலை செய்த 5 பேரைப் போலீசார் கைது செய்துள்ளனர்.

சிற்றத்தூர் கிராமத்தைச் சேர்ந்த பெயிண்டர் மாரி (எ) ரூபன் (32), பழைய வழக்கு ஒன்றில் ஜாமீனில் வெளிவந்து வெங்கல் காவல் நிலையத்தில் கையெழுத்திட்டுவிட்டுத் தன் நண்பர் வெங்கடேசனுடன் மோட்டார் சைக்கிளில் திரும்பிச் சென்று கொண்டிருந்தார். பாகல்மேடு பேருந்து நிறுத்தம் அருகே சென்றபோது, பின்னால் வந்த கார் ஒன்று இவர்களது பைக் மீது பயங்கரமாக மோதியது. இதில் இருவரும் கீழே விழுந்தனர்.

காரில் இருந்து இறங்கிய 5 பேர் கொண்ட கும்பல் அரிவாள் மற்றும் கத்திகளுடன் மாரியைச் சூழ்ந்தது. தப்பி ஓட முயன்ற மாரியைப் பட்டப்பகலில் பொதுமக்கள் முன்னிலையில் ஓட ஓட விரட்டிச் சரமாரியாக வெட்டினர். இதில் மணிக்கட்டு துண்டாகி, முகம் சிதைந்து மாரி சம்பவ இடத்திலேயே துடிதுடித்து உயிரிழந்தார்.

கொலையை முடித்துவிட்டுத் தப்ப முயன்ற போது, கட்டுப்பாட்டை இழந்த கார் அருகில் இருந்த வீட்டின் சுவரில் மோதியது. உடனடியாகத் திரண்ட பொதுமக்கள் காரில் இருந்த 3 பேரைப் பிடித்துத் தர்ம அடி கொடுத்துப் पोलिसाாரிடம் ஒப்படைத்தனர். இச்சம்பவத்தில் தொடர்புடைய தீனா (25), நரேஷ் (20), விக்கி (23), பேரரசு (19) மற்றும் ராஜ்குமார் (20) ஆகிய 5 பேரையும் போலீசார் கைது செய்து, அவர்களிடமிருந்து கார் மற்றும் ஆயுதங்களைப் பறிமுதல் செய்தனர்.

கைதான தீனாவின் திருமணமான சகோதரி தீபாவுடன் மாரிக்குக் கள்ளத்தொடர்பு இருந்துள்ளது. இதனால் குடும்பத்தில் பிரச்சனை ஏற்பட்டு கடந்த டிசம்பர் மாதம் தீபா தற்கொலை செய்துகொண்டார். இதற்குப் பழிவாங்குவதற்காகவே தீனா தன் நண்பர்களுடன் சேர்ந்து இக்கொலை திட்டத்தை அரங்கேற்றியது விசாரணையில் தெரியவந்துள்ளது. கொலை செய்யப்பட்ட மாரிக்கு மனைவியும் 2 மகன்களும் உள்ளனர் என்பது குறிப்பிடத்தக்கது.