திருவள்ளூர் மாவட்டம் மீஞ்சூரில் கடந்த 10 ஆண்டுகளுக்கும் மேலாக மந்தகதியில் நடைபெற்று வரும் ரயில்வே மேம்பாலப் பணிகளை மாவட்ட ஆட்சித்தலைவர் நேரில் ஆய்வு செய்த போது, அரசுப் பேருந்து நடத்துனர் ஒருவர் உணர்ச்சிவசப்பட்டு, மக்களின் அவதி குறித்துக் கண்ணீர் மல்கக் கோரிக்கை விடுத்த சம்பவம் அப்பகுதியில் பெரும் பரபரப்பை ஏற்படுத்தியுள்ளது. 

திருவள்ளூர் மாவட்டம் மீஞ்சூர் ரயில் நிலையப் பகுதியில் நிலவி வரும் கடுமையான போக்குவரத்து நெரிசலுக்குக் காரணமான, நீண்ட காலமாக முடங்கிக் கிடக்கும் ரயில்வே உயர்மட்ட மேம்பாலப் பணிகளை மாவட்ட ஆட்சித்தலைவர் கவிதா இ.ஆ.ப. நேற்று நேரில் பார்வையிட்டு ஆய்வு செய்தார். அப்போது அதிகாரிகளின் அலட்சியப் போக்கைக் கண்டித்துப் பொதுமக்கள் மற்றும் அரசு ஊழியர் ஒருவர் நடத்திய திடீர் போராட்டம் அங்குப் பரபரப்பான சூழலை உருவாக்கியது.

மீஞ்சூர் மற்றும் அதன் சுற்றுவட்டார நுகர்வோர்கள் மற்றும் பொதுமக்களின் நீண்ட நாள் கோரிக்கையான இந்த மேம்பாலப் பணிகள் குறித்துக் காவல் துறை மற்றும் உள்ளூர் நிர்வாகத் தரப்பில் கூறுகையில், மீஞ்சூர் ரயில் நிலையம் அருகே கடந்த 10 ஆண்டுகளுக்கும் மேலாக இந்த மேம்பாலக் கட்டுமானப் பணிகள் ஆமை வேகத்தில் நடைபெற்று வருகின்றன. இதனால் ஒட்டுமொத்த மீஞ்சூர் பகுதியிலும் தினசரி கடுமையான போக்குவரத்து நெரிசல் ஏற்பட்டு, பள்ளி வாகனங்கள் மற்றும் அவசரச் சிகிச்சை வாகனங்கள் கூடச் செல்ல முடியாமல் முடங்கும் அவலநிலை நீடிக்கிறது.

நேற்று மாலை மாவட்ட ஆட்சியர் கவிதா அதிகாரிகளுடன் ஆய்வுக்கு வந்ததைக் கண்ட அப்பகுதி மக்கள், உடனடியாக அவரைச் சூழ்ந்து கொண்டு முற்றுகையிட்டனர். "ஒவ்வொரு முறையும் அதிகாரிகள் வந்து பார்த்துவிட்டுச் செல்கிறார்களே தவிர, பணிகள் முடிவடைந்தபாடில்லை" எனக் கூறி அதிகாரிகளுடன் கடுமையான வாக்குவாதத்தில் ஈடுபட்டனர்.

பொதுமக்களின் முற்றுகை ஒருபுறம் நீடித்த நிலையில், அந்த வழித்தடத்தில் வந்த அரசுப் பேருந்து ஒன்றின் நடத்துனர், பேருந்தை நிறுத்தச் சொல்லிவிட்டு ஓடிவந்து ஆட்சியரிடம் அழுது கொண்டே கோரிக்கை வைத்தார். "மேடம், உங்க கால்ல வேணாலும் விழுறேன்.. இது 'ஷூட்டிங் ஆட்சி'யா மாறிடக் கூடாது. நீங்க ஆய்வுக்கு வர்றீங்கன்னு தெரிஞ்சதும், இப்போதைக்கு 4 ஆட்களை வச்சு வேலை நடக்குற மாதிரி நாடகம் ஆடுறாங்க. கடந்த 5 வருஷமா இப்படித்தான் ஏமாத்துறாங்க. இந்த மேம்பாலப் பணிகளால தினமும் பல மணி நேரம் போக்குவரத்து நெரிசலில் பஸ் மாட்டிக்குது. இதனால பயணிகள் அசிங்க அசிங்கமா எங்களைத் திட்டுறாங்க, எங்களால் காது கொடுத்துக் கேட்கவே முடியல. தயவுசெஞ்சு இந்தப் பாலத்தை உடனே முடிக்க உத்தரவிடுங்க மேடம்" எனப் பேருந்து நடத்துனர் கண்ணீர் மல்கக் கெஞ்சினார்.

அரசுப் பேருந்து நடத்துனர் மற்றும் பொதுமக்களின் ஆதங்கத்தை உன்னிப்பாகக் கேட்டறிந்த மாவட்ட ஆட்சியர் கவிதா இ.ஆ.ப., அங்கிருந்த நெடுஞ்சாலைத் துறை மற்றும் ரயில்வே அதிகாரிகளைக் கடுமையாக எச்சரித்தார்.  அதிகாரிகள் காட்டும் அலட்சியக் காரணங்களை ஏற்க மறுத்த ஆட்சியர், ஆய்விற்காகத் தற்காலிகமாக ஆட்களை நியமித்து நாடகமாடக் கூடாது என்றும், கூடுதல் பணியாளர்களைக் கொண்டு உடனடியாகப் பணிகளைத் துரிதப்படுத்த வேண்டும் என்றும் உத்தரவிட்டார்.

பொதுமக்கள் மற்றும் நுகர்வோர்களின் அன்றாடப் பாதிப்பிற்கு முற்றுப்புள்ளி வைக்கும் வகையில், குறிப்பிட்ட காலக்கெடுவுக்குள் மேம்பாலப் பணிகளை முழுமையாக முடித்து மக்கள் பயன்பாட்டிற்குத் திறக்க வேண்டும், தவறும்பட்சத்தில் சம்பந்தப்பட்ட ஒப்பந்ததாரர்கள் மற்றும் அதிகாரிகள் மீது கடுமையான துறை ரீதியான நடவடிக்கை பாயும் என எச்சரித்துவிட்டுச் சென்றார்.

பேருந்து நடத்துனர் ஒருவர் பொதுமக்களின் துயரத்தை எண்ணி மாவட்ட ஆட்சியரிடம் பொது இடத்தில் தழுதழுத்த குரலில் கெஞ்சிய இந்த நெகிழ்ச்சியான காணொளி சமூக வலைத்தளங்களில் நுகர்வோர்கள் மத்தியில் வேகமாகப் பரவி வருகிறது.