தமிழக சட்டமன்றத் தேர்தல் முடிவுகளில் மற்றுமொரு முக்கியத் திருப்பமாக, சிவகங்கை மாவட்டம் காரைக்குடி தொகுதியில் போட்டியிட்ட நாம் தமிழர் கட்சியின் தலைமை ஒருங்கிணைப்பாளர் சீமான் தோல்வியைத் தழுவியுள்ளார். இத்தொகுதியில் அவரை எதிர்த்துத் தமிழக வெற்றிக் கழகத்தின் சார்பில் களம் கண்ட வேட்பாளர் டி.கே. பிரபு, ஆரம்பம் முதலே முன்னிலை பெற்று இறுதியில் மிகப்பெரிய வெற்றியைப் பதிவு செய்துள்ளார்.

அரசியல் களத்தில் நீண்ட அனுபவம் கொண்ட சீமானை, தான் சந்தித்த முதல் தேர்தலிலேயே வீழ்த்தி டி.கே. பிரபு இந்த வரலாற்றுச் சிறப்புமிக்க வெற்றியை வசப்படுத்தியுள்ளார். காரைக்குடி தொகுதியில் தவெக நிலைநாட்டியுள்ள இந்த அதிரடி வெற்றி, அந்த மாவட்டத்தின் அரசியல் சித்திரத்தையே மாற்றியமைத்துள்ளது. இவ்வளவு பெரிய நட்சத்திர வேட்பாளரைத் தங்களது கட்சி வேட்பாளர் தோற்கடித்தது தவெக தொண்டர்களிடையே எல்லையற்ற உற்சாகத்தை ஏற்படுத்தியுள்ளது.

சீமானின் இந்தத் தோல்வி நாம் தமிழர் கட்சியினருக்குப் பெரும் அதிர்ச்சியை அளித்துள்ள நிலையில், காரைக்குடி தொகுதி முழுவதும் தவெகவினர் விசில்களை ஊதியும், இனிப்புகள் வழங்கியும் தங்களது வெற்றியைக் கொண்டாடி வருகின்றனர். மாநிலம் முழுவதும் தவெக வேட்பாளர்கள் பல இடங்களில் முன்னிலை பெற்று வரும் சூழலில், காரைக்குடியில் கிடைத்துள்ள இந்த வெற்றி விஜய்யின் அரசியல் நகர்வுகளுக்குக் கிடைத்துள்ள மிகப்பெரிய அங்கீகாரமாகப் பார்க்கப்படுகிறது.