இந்தியாவில் தங்கத்தின் தேவை கடந்த ஆண்டுடன் ஒப்பிடுகையில் நடப்பு ஆண்டின் ஜூலை முதல் செப்டம்பர் வரையிலான மூன்றாவது காலாண்டில் 29 சதவீதம் சரிந்துள்ளதாக உலக தங்க கவுன்சில் தெரிவித்துள்ளது.

கடந்த ஆண்டு இதே காலாண்டில் 229.8 டன்னாக இருந்த இந்தியாவின் தங்கத் தேவை, இந்த ஆண்டு 162.5 டன்னாகக் குறைந்துள்ளது. தங்கத்தின் விலை தொடர்ந்து உயர்ந்திருப்பது, இறக்குமதி வரி அதிகரிப்பு உள்ளிட்ட காரணங்களால் நகை வாங்குவது மற்றும் முதலீடு செய்வது குறைந்துள்ளதாகக் கூறப்படுகிறது.

குறிப்பாக, நகைகளுக்கான தேவை 20 சதவீதம் சரிந்து 99.9 டன்னாகப் பதிவாகியுள்ளது. தங்கக்கட்டி மற்றும் நாணயங்கள் வாயிலான முதலீட்டுத் தேவையும் கடந்த ஆண்டுடன் ஒப்பிடுகையில் 40 சதவீதம் குறைந்து 55 டன்னாக உள்ளது.

இருப்பினும், தங்கத்தின் விலை உயர்வால் அதன் மொத்த மதிப்பு அதிகரித்துள்ளது. மூன்றாவது காலாண்டில் இந்தியாவின் தங்கத் தேவையின் மதிப்பு 3 சதவீதம் உயர்ந்து ரூ.2.42 லட்சம் கோடியாக உள்ளது.

வரும் காலாண்டில் தீபாவளி மற்றும் திருமணக் காலத்தை முன்னிட்டு தங்கம் வாங்குவது அதிகரிக்கலாம் என உலக தங்க கவுன்சில் எதிர்பார்க்கிறது. அதேசமயம், உயர்ந்த விலை காரணமாக வாங்கப்படும் தங்கத்தின் அளவு கட்டுப்பாட்டில் இருக்கலாம் என்றும் தெரிவிக்கப்பட்டுள்ளது.