அதிகரிக்கும் இந்தியாவின் எரிசக்தி... அந்தமானில்  இயற்கை எரிவாயு வளம் கண்டுபிடிப்பு!

ஈரான் நாட்டின் மீது இஸ்ரேல் மற்றும் அமெரிக்கா நடத்திய தாக்குதல்கள் காரணமாக உலகளவில் திடீரென கச்சா எண்ணெய் மற்றும் எரிபொருள் தட்டுப்பாடு ஏற்பட்டுள்ளது. இத்தகைய இக்கட்டான சூழ்நிலையில், இந்தியாவின் சொந்த எரிசக்தி பாதுகாப்பை மேலும் அதிகரிக்கும் நோக்கில் மத்திய அரசு பல்வேறு தீவிர முயற்சிகளை மேற்கொண்டு வந்தது. அதன் ஒரு பகுதியாக, மத்திய அரசின் சமுத்ர மந்தன் திட்டத்தின் கீழ் அந்தமான் கடற்பகுதியில் மிகப்பெரிய அளவிலான இயற்கை எரிவாயு வளம் தற்பொழுது கண்டுபிடிக்கப்பட்டுள்ளது.

அந்தமான் கடலில் அமைந்துள்ள ஸ்ரீ விஜயபுரம் -3 என்ற குறிப்பிட்ட கடற்பகுதியில் இந்த புதிய எரிவாயு வளம் கண்டறியப்பட்டுள்ளதாகத் தகவல்கள் தெரிவிக்கின்றன. இந்த பகுதியில் கண்டறியப்பட்டுள்ள இயற்கை எரிவாயு இருப்பு, அடுத்த 30 முதல் 40 ஆண்டுகள் வரை நாட்டிற்குத் தங்கு தடையின்றி முழுமையாகக் கிடைக்கும் என்று மத்திய பெட்ரோலிய மற்றும் இயற்கை எரிவாயுத்துறை அமைச்சர் ஹர்தீப் புரி அதிகாரப்பூர்வமாகத் தெரிவித்துள்ளார்.

சர்வதேச சந்தையில் நிலவும் எரிபொருள் விலை உயர்வு மற்றும் தட்டுப்பாடுகளுக்கு மத்தியில் கிடைத்துள்ள இந்த புதிய எரிவாயு ஆதாரம், எதிர்காலத்தில் இந்தியாவின் ஒட்டுமொத்த உள்நாட்டு எரிபொருள் தேவையை மிக எளிதாகப் பூர்த்தி செய்ய உதவும் என எதிர்பார்க்கப்படுகிறது. மேலும், இந்த கண்டுபிடிப்பு வெளிநாடுகளில் இருந்து இறக்குமதி செய்யப்படும் எரிவாயுவின் அளவைக் கணிசமாகக் குறைத்து, நாட்டின் பொருளாதார வளர்ச்சிக்கும் நாட்டின் பாதுகாப்பிற்கும் பெரும் பலம் சேர்க்கும் என்று பொருளாதார வல்லுநர்கள் கருத்து தெரிவித்துள்ளனர்.