இந்தியத் துப்பாக்கிச் சூடு விளையாட்டின் அடையாளமாகவும், நாட்டின் மிகச்சிறந்த பயிற்சியாளராகவும் திகழ்ந்த ஒலிம்பியன் ஜஸ்பால் ராணா (49) மாரடைப்பால் புதுடெல்லியில் உள்ள தனியார் மருத்துவமனையில் காலமானார். ஜெர்மனியின் முனிச் நகரில் நடைபெற்ற ஐஎஸ்எஸ்எஃப் உலகக் கோப்பை தொடரை முடித்துவிட்டு கடந்த வாரம் தாயகம் திரும்பிய அவருக்கு, விமானப் பயணத்தின் போதே நெஞ்சு வலிக்கான அறிகுறிகள் ஏற்பட்டுள்ளன.

அமிலத்தன்மை காரணமாக இந்த அசௌகரியம் ஏற்பட்டதாக அவரே முதலில் தவறாகப் புரிந்து கொண்டுள்ளார். எனினும், டெல்லி வந்தடைந்ததும் உடல்நிலை மோசமடைந்ததால், அவர் சாகேட்டில் உள்ள மேக்ஸ் மருத்துவமனையில் அனுமதிக்கப்பட்டு, அங்கு அவருக்கு ஸ்டென்ட் வைக்கும் அவசர இதய அறுவை சிகிச்சையும் செய்யப்பட்டது. தொடர்ந்து தீவிர சிகிச்சைப் பிரிவில் இருந்த அவர், சிகிச்சை பலனின்றி உயிரிழந்தார். இவருக்கு மனைவியும் இரண்டு குழந்தைகளும் உள்ளனர்.

உத்தரகாண்ட் மாநிலம் உத்தரகாசியில் 1976 ஜூன் 28 அன்று பிறந்த ஜஸ்பால் ராணா, தனது 12 வயதிலேயே தேசிய அளவில் வெள்ளிப் பதக்கம் வென்று துப்பாக்கிச் சூடு உலகில் கால்பதித்தார். 1994 மிலன் உலக ஜூனியர் சாம்பியன்ஷிப்பில் உலக சாதனையுடன் தங்கம் வென்று சர்வதேச அரங்கில் முத்திரை பதித்த அவர், அதே ஆண்டு ஹிரோஷிமா ஆசிய விளையாட்டுப் போட்டியிலும் தங்கம் வென்று அசத்தினார்.

காமன்வெல்த் விளையாட்டுப் போட்டிகளின் வரலாற்றில் இந்தியாவின் மிக வெற்றிகரமான வீராகத் திகழும் ராணா, 1994 முதல் 2006 வரை நடந்த நான்கு தொடர்களில் 9 தங்கம், 4 வெள்ளி, 2 வெண்கலம் என மொத்தம் 15 பதக்கங்களைக் குவித்துள்ளார். குறிப்பாக, 2006 தோஹா ஆசிய விளையாட்டுப் போட்டியில் கடுமையான காய்ச்சலையும் பொருட்படுத்தாமல் களம் கண்டு, 3 தங்கம் மற்றும் ஒரு வெள்ளிப் பதக்கங்களை வென்றதுடன், 25 மீட்டர் சென்டர் ஃபையர் பிஸ்டல் பிரிவில் 590 புள்ளிகள் பெற்று உலக சாதனையைச் சமன் செய்தார். இவர் 1996 அட்லாண்டா ஒலிம்பிக் போட்டியிலும் இந்தியாவைப் பிரதிநிதித்துவப்படுத்தியுள்ளார்.

விளையாட்டுப் போட்டிகளில் இருந்து ஓய்வு பெற்ற பிறகு, 2012 முதல் முழுநேரப் பயிற்சியாளராக மாறினார். இந்தியத் துப்பாக்கிச் சூடு அணியின் 'உயர்-செயல்திறன் பயிற்சியாளராக' பணியாற்றிய அவர், சர்வதேச தரம் வாய்ந்த பல இளம் வீரர்களை உருவாக்கினார். சவுரப் சவுத்ரி, அனிஷ் பன்வாலா, சிங்கி யாதவ் போன்ற பல திறமையான வீரர்களை செதுக்கிய பெருமை இவருக்கு உண்டு.

குறிப்பாக, கடந்த 2024 பாரிஸ் ஒலிம்பிக் போட்டியில் இந்தியாவிற்கு இரு வெண்கலப் பதக்கங்களைப் பெற்றுத் தந்து வரலாற்றுச் சாதனை படைத்த நட்சத்திர வீராங்கனை மனு பாக்கரின்  தனிப்பட்ட பயிற்சியாளராக இருந்து, அவரது சரிவிலிருந்து மீட்டுவந்து இந்த இமாலய வெற்றியைப் பெற்றுத் தந்தார்.

விளையாட்டுத் துறையில் ஜஸ்பால் ராணாவின் மகத்தான பங்களிப்பைப் பாராட்டி, இந்திய அரசு அவருக்கு 1994-ல் அர்ஜுனா விருதும், 1997-ல் பத்மஸ்ரீ விருதும் வழங்கி கௌரவித்தது. மேலும் சிறந்த பயிற்சியாளருக்கான உயரிய 'துரோணாச்சார்யா' விருதை கடந்த 2020 ஆம் ஆண்டு அவர் பெற்றார்.

ஜஸ்பால் ராணாவின் திடீர் மறைவுக்குப் பிரதமர் நரேந்திர மோடி, குடியரசுத் தலைவர் திரௌபதி முர்மு, மத்திய பாதுகாப்புத் துறை அமைச்சர் ராஜ்நாத் சிங் மற்றும் தேசிய துப்பாக்கிச் சுடுதல் சங்கம் உள்ளிட்ட பல முன்னணித் தலைவர்களும் விளையாட்டுத் துறையினரும் தங்களின் ஆழ்ந்த இரங்கல்களைத் தெரிவித்துள்ளனர். இந்திய விளையாட்டு உலகிற்கு அவரது மறைவு ஈடுசெய்ய முடியாத ஒரு பேரிழப்பாகக் கருதப்படுகிறது.