பாரிஸ் ஒலிம்பிக்கில் பங்கேற்ற 21 வயதான இந்தியக் குத்துச்சண்டை வீராங்கனை பிரீத்தி பவார், கிளாஸ்கோவில் நடைபெறவுள்ள காமன்வெல்த் விளையாட்டுப் போட்டிகளில் இந்தியாவின் முதன்மைப் பதக்க நம்பிக்கையாகக் களமிறங்குகிறார். இளம் வயதிலேயே சர்வதேசக் குத்துச்சண்டை அரங்கில் முத்திரை பதித்து வரும் பிரீத்தி பவார், 2026-ஆம் ஆண்டில் அடுத்தடுத்து பல வரலாற்றுச் சாதனைகளைப் படைத்துள்ளார்.

ஆசியக் குத்துச்சண்டை சாம்பியன்ஷிப் போட்டியின் இறுதிப் போட்டியில் மும்முறை உலக சாம்பியனை வீழ்த்தி தங்கம் வென்றார். அதைத் தொடர்ந்து, உலகக் குத்துச்சண்டை கோப்பை இறுதிப் போட்டிகள் மற்றும் கோல்ட் கிராண்ட் பிரிக்ஸ் தொடர்களிலும் சாம்பியன் பட்டம் வென்றார். இன்ஸ்பயர் இன்ஸ்டிடியூட் ஆஃப் ஸ்போர்ட் ஆதரவுடன் பயிற்சிகளை மேற்கொண்டு வரும் இவர், பெண்களுக்கான 54 கிலோ எடைப் பிரிவில் உலகின் மிக முக்கிய வீராங்கனைகளில் ஒருவராக உருவெடுத்துள்ளார்.

தமது முதலாவது காமன்வெல்த் போட்டிகள் குறித்துப் பேசிய பிரீத்தி பவார், தாய்நாட்டைப் பிரதிநிதித்துவப்படுத்துவதே தமது மிகப்பெரிய உந்துதல் எனக் குறிப்பிட்டுள்ளார். "நான் பதக்கத்தைப் பற்றியோ அல்லது எதிர்பார்ப்புகளைப் பற்றியோ அதிகம் யோசிப்பதில்லை. ஒழுக்கத்துடன் இருப்பது, தயாரிப்பு முறைகளை நம்புவது மற்றும் ஒவ்வொரு போட்டியையும் தனித்தனியாகக் கையாள்வதில் மட்டுமே கவனம் செலுத்துகிறேன். திட்டமிட்டபடி விளையாடினால் முடிவுகள் தானாகவே சாதகமாக அமையும்" எனக் கூறியுள்ளார்.

தேசிய முகாம் மற்றும் இன்ஸ்பயர் இன்ஸ்டிடியூட் ஆஃப் ஸ்போர்ட்டில் அளிக்கப்பட்ட தீவிரப் பயிற்சிகள், நுட்பம், மன ரீதியான தயார்நிலை மற்றும் உடல்தகுதியில் தமக்கு பெரும் முன்னேற்றத்தை ஏற்படுத்தியுள்ளதாகத் தெரிவித்துள்ளார். உலகத் தரம் வாய்ந்த வீரர்களுடன் போட்டியிட்ட அனுபவம் தன்னம்பிக்கையை அதிகரித்துள்ளதாகத் தெரிவிக்கும் பிரீத்தி, "இந்திய ஜெர்சியை அணிந்து களமிறங்குவது பெருமைக்குரிய தருணம். வெற்றிக்குப் பின் தேசிய கீதம் ஒலிப்பதைக் கேட்பது விவரிக்க முடியாத உணர்வு. அதை மீண்டும் அனுபவிக்க காமன்வெல்த் போட்டிகளில் எனது முழுத் திறமையையும் வெளிப்படுத்துவேன்" எனக் கூறியுள்ளார்.