கடந்த ஏப்ரல் 12, 2026 அன்று மும்பை வான்கடே மைதானத்தில் நடைபெற்ற ஐபிஎல் லீக் போட்டியில், பெங்களூரு ராயல் சேலஞ்சர்ஸ் மற்றும் மும்பை இந்தியன்ஸ் அணிகள் மோதின. இந்த விறுவிறுப்பான போட்டியில் பெங்களூரு அணி 18 ரன்கள் வித்தியாசத்தில் வெற்றி பெற்றாலும், அந்த அணியின் நட்சத்திர வீரர் டிம் டேவிட் ஒழுங்கீன நடவடிக்கையாக அபராதத்திற்கு உள்ளாகியுள்ளார். போட்டியின் 18-வது ஓவரின் போது (17.2 ஓவர்), பந்தின் தன்மை மாற்றமடைந்ததால் நடுவர்கள் புதிய பந்தை அறிமுகப்படுத்தினர்.

அந்தப் புதிய பந்தை ஆய்வு செய்ய வேண்டும் எனக் கேட்டு வாங்கிய டிம் டேவிட், நடுவர்கள் பலமுறை கேட்டும் பந்தைத் திருப்பிக் கொடுக்காமல் தாமதப்படுத்தினார். அவர் பந்தை வைத்து வித்தை காட்டுவது போலவும், நடுவர்களைக் கிண்டல் செய்வது போலவும் செயல்பட்டது மைதானத்தில் பரபரப்பை ஏற்படுத்தியது.

இதேபோன்ற ஒரு சம்பவம் 20-வது ஓவரிலும் (19.2 ஓவர்) அரங்கேறியது. நடுவர்களின் அறிவுறுத்தல்களைத் தொடர்ந்து மதிக்கத் தவறியது, ஐபிஎல் நடத்தை விதிகளின் கீழ் குற்றமாகக் கருதப்பட்டது.

ஐபிஎல் நடத்தை விதியின் பிரிவு 2.4-ஐ (நடுவரின் அறிவுறுத்தல்களுக்குக் கீழ்ப்படியாமை) மீறியதற்காக டிம் டேவிட்டிற்குப் பின்வரும் தண்டனைகள் விதிக்கப்பட்டுள்ளன. அவரது ஒரு போட்டி கட்டணத்தில் 25% அபராதமாக விதிக்கப்பட்டுள்ளது. நடத்தை விதியின் நிலை-1 மீறலுக்காக அவருக்கு ஒரு டிமெரிட் புள்ளி  வழங்கப்பட்டுள்ளது.

டிம் டேவிட் தனது தவறை ஒப்புக்கொண்டதால், இந்த விவகாரத்தில் மேல் விசாரணை ஏதுமின்றி போட்டி நடுவர் தனது இறுதித் தீர்ப்பை வழங்கினார்.