மத்திய கிழக்கு பிராந்தியத்தில் போர் மேகங்கள் சூழ்ந்துள்ள நிலையில், நேற்று ஈரானில் இருந்து ஏவப்பட்ட ஏவுகணைகள் கத்தாரின் ராஸ் லாஃபான் தொழிற்பேட்டையைத் தாக்கின. இது உலகளாவிய எரிசக்தி சந்தையில் பெரும் அதிர்ச்சியை ஏற்படுத்தியுள்ளது.

கடந்த மார்ச் 18-ம் தேதி, ஈரான் மற்றும் கத்தார் நாடுகள் கூட்டாகப் பகிர்ந்து கொள்ளும் உலகின் மிகப்பெரிய இயற்கை எரிவாயு வயலான 'சவுத் பார்ஸ்' மீது இஸ்ரேல் வான்வழித் தாக்குதல் நடத்தியது. இதற்குப் பதிலடியாகவே, ஈரான் கத்தாரில் உள்ள எரிவாயு நிலையங்களைக் குறிவைத்ததாகக் கருதப்படுகிறது.

கத்தார் எரிசக்தி நிறுவனம் வெளியிட்டுள்ள அறிக்கையின்படி, ராஸ் லாஃபான் வளாகத்தில் உள்ள பேர்ல் ஜிடிஎல் ஆலை மற்றும் பல எல்என்ஜி உற்பத்தி மையங்கள் ஈரானிய ஏவுகணைகளால் கடுமையாகச் சேதமடைந்துள்ளன. இதனால் கத்தார் தனது எரிவாயு விநியோகத்தில், தவிர்க்க முடியாத காரணத்தால் விநியோக நிறுத்தம் அறிவித்துள்ளது. இந்தச் சேதங்களைச் சரிசெய்ய 3 முதல் 5 ஆண்டுகள் வரை ஆகலாம் எனக் கூறப்படுகிறது. இந்தத் தாக்குதலைத் தொடர்ந்து அமெரிக்க அதிபர் டொனால்ட் ட்ரம்ப் தனது 'ட்ரூத் சோஷியல்' தளத்தில் அதிரடி எச்சரிக்கை ஒன்றை விடுத்துள்ளார்:

"இஸ்ரேல் சவுத் பார்ஸ் மீது தாக்குதல் நடத்தியது குறித்து அமெரிக்காவிற்கு முன்கூட்டியே தெரியாது; இதில் கத்தாருக்கும் எந்தத் தொடர்பும் இல்லை" என அவர் குறிப்பிட்டுள்ளார்.

"இஸ்ரேல் இனி சவுத் பார்ஸ் மீது தாக்குதல் நடத்தாது. ஆனால், ஈரான் மீண்டும் ஒருமுறை அப்பாவி நாடான கத்தார் மீது கைவைத்தால், அமெரிக்கா நேரடியாகக் களமிறங்கி ஈரானின் மொத்த சவுத் பார்ஸ் எரிவாயு வயலையும் தரைமட்டமாக்கும்" என ட்ரம்ப் எச்சரித்துள்ளார்.

ஐரோப்பிய சந்தையில் இயற்கை எரிவாயு விலை ஒரே நாளில் 35% வரை உயர்ந்துள்ளது. கச்சா எண்ணெய் விலை ஒரு பேரல் 108 டாலரைத் தாண்டியுள்ளது. இது இந்தியா போன்ற நாடுகளிலும் எரிபொருள் விலை உயர்வை ஏற்படுத்தக்கூடும்.