2026 தமிழக சட்டமன்றத் தேர்தலுக்கான அதிமுகவின் 23 பேர் கொண்ட முதற்கட்ட வேட்பாளர் பட்டியலை அக்கட்சியின் பொதுச்செயலாளர் எடப்பாடி பழனிசாமி இன்று வெளியிட்டார். அனுபவம் வாய்ந்த முன்னாள் அமைச்சர்களுக்கே இந்தப் பட்டியலில் முன்னுரிமை அளிக்கப்பட்டுள்ளது. அதிமுகவின் மூத்த தலைவர்களில் ஒருவரான முன்னாள் அமைச்சர் டி. ஜெயக்குமார், தனது கோட்டையான ராயபுரம் தொகுதியில் தொடர்ந்து 7-வது முறையாகப் போட்டியிடுகிறார். 1991, 2001, 2006, 2011 மற்றும் 2016 ஆகிய தேர்தல்களில் இதே தொகுதியில் வெற்றி பெற்றவர். 2021 தேர்தலில் தோல்வியடைந்திருந்தாலும், இந்த முறை மீண்டும் அதே தொகுதியில் தனது செல்வாக்கை நிரூபிக்க அவருக்குக் கட்சித் தலைமை வாய்ப்பளித்துள்ளது.

அதிமுக பொதுச்செயலாளர் எடப்பாடி பழனிசாமி, தனது சொந்தத் தொகுதியான எடப்பாடி தொகுதியிலேயே மீண்டும் போட்டியிடுகிறார். கடந்த முறை விழுப்புரம் தொகுதியில் போட்டியிட்டுத் தோல்வியடைந்த சி.வி. சண்முகம், இந்த முறை மயிலம் தொகுதிக்கு மாற்றப்பட்டுள்ளார்.

முன்னாள் அமைச்சர்கள் எஸ்.பி. வேலுமணி (தொண்டாமுத்தூர்), பி. தங்கமணி (குமாரபாளையம்), திண்டுக்கல் சீனிவாசன் (திண்டுக்கல்), நத்தம் விஸ்வநாதன் (நத்தம்), செல்லூர் ராஜு (மதுரை மேற்கு), சி. விஜயபாஸ்கர் (விராலிமலை), ஓ.எஸ். மணியன் (வேதாரண்யம்) உள்ளிட்ட 21 முன்னாள் அமைச்சர்கள் இந்தப் பட்டியலில் இடம்பெற்றுள்ளனர்.

கூட்டணிப் பேச்சுவார்த்தைகள் ஒருபுறம் நடந்து கொண்டிருந்தாலும், செல்வாக்கு மிக்க மூத்த தலைவர்களை முன்கூட்டியே அறிவிப்பதன் மூலம் தேர்தல் பணிகளை விரைவுபடுத்த அதிமுக திட்டமிட்டுள்ளது. குறிப்பாக, ராயபுரம் போன்ற நட்சத்திரத் தொகுதிகளில் இப்போதே பிரசாரத்தைத் தொடங்க ஜெயக்குமார் ஆதரவாளர்கள் தயாராகி வருகின்றனர்.